Па словах кіраўніка Расеі, стаўку на такіх грамадзян робіць «Захад», спрабуючы нашкодзіць краіне. Да людзей, якія проста трацяць грошы за мяжой, у яго пытаньняў няма.
Выступаючы на нарадзе аб мерах сацыяльна-эканамічнай падтрымкі рэгіёнаў, Пуцін ізноў скрытыкаваў заходнія краіны, заявіўшы, што тыя спрабуюць «адмяніць» Расею. Краіну, паводле яго слоў, спрабуюць «адправіць за Мажай», «ператварыць у слабую, залежную» і, «у лепшым для іх варыянце», разьдзяліць.
У гэтым, заяўляе ён, заходнія краіны будуць рабіць стаўку на «пятую калёну». «Я зусім не асуджаю тых, у каго віла ў Маямі ці на Францускай Рыўеры, хто ня можа абысьціся без фуа-гра, вустрыц або так званых гэндэрных свабодаў. Але праблема абсалютна ня ў гэтым, а ў тым, што многія з такіх людзей па сваёй сутнасьці, мэнтальна знаходзяцца менавіта там, а ня тут, ня з нашым народам, не з Расеяй», — цытуе яго дзяржаўнае агенцтва ТАСС.
Паводле слоў Пуціна, расейскі народ «заўсёды зможа адрозьніць сапраўдных патрыётаў ад падонкаў і здраднікаў», а апошніх проста «выплюне, як мушку, якая выпадкова заляцела ў рот». На думку Пуціна, такое «натуральнае і неабходнае самаачышчэньне грамадзтва» ўмацуе краіну.
За час прэзыдэнцтва Ўладзіміра Пуціна ў Расеі быў прыняты шэраг рэпрэсіўных законаў, якія абмяжоўваюць грамадзянскія правы жыхароў Расеі. Некамэрцыйныя арганізацыі і СМІ, у якіх могуць быць знойдзены сьляды замежнага фінансаваньня, прызнаюцца «замежнымі агентамі», за шэраг парушэньняў законаў аб арганізацыі або за ўдзел у пратэставых акцыях была ўведзена крымінальная адказнасьць.
Пры гэтым адносіны Масквы з краінамі Захаду сапсаваліся толькі пасьля ўводу расейскіх войскаў у Грузію ў 2008 годзе, а затым пасьля анэксіі Крыму і ўварваньня ў Данбас у 2014-м. У 2022-м Расея фактычна апынулася ў міжнароднай ізаляцыі з боку краінаў Захаду.
