«Медиазона» ўдакладняе, што пракурор Надзея Ціханава падчас спрэчак запрасіла 10 гадоў пазбаўленьня волі Навальнаму. З улікам ужо раней вынесеных яму прысудаў пракурор патрабавала прызначыць яму 13 гадоў калёніі.
Суд праходзіць у Пакроўскай калёніі № 2 ва Ўладзімірскай вобласьці, дзе палітык адбывае пакараньне ў так званай справе «Іў Рашэ». Справу разглядае Лефортаўскі суд Масквы на выязным паседжаньні. Навальнаму ставяцца ў віну два эпізоды артыкулу 297 КК (частка 1 «Абраза ўдзельнікаў судовага разбору» і частка 4 «Абраза судзьдзі») і чатыры эпізоды часткі 4 артыкулу 159 КК («Махлярства ў асабліва буйным памеры»).
Першы эпізод тычыцца абразы судзьдзі Веры Акімавай, пракурора Кацярыны Фраловай і сьведкі Ігара Калесьнікава — унука вэтэрана Ігара Арцёменкі, за паклёп на якога апазыцыянэра судзілі ў пачатку 2021 году.
Па другім эпізодзе, паводле вэрсіі абвінавачаньня, Фонд барацьбы з карупцыяй прысвоіў атрыманыя ахвяраваньні. У абвінаваўчым заключэньні гаворыцца, што Навальны і яго паплечнікі шляхам «падману і злоўжываньня даверам» зьбіралі данаты на выбарчую кампанію, але распараджаліся імі «ў асабістых мэтах і для дзейнасьці». З 300 тысяч чалавек, якія ахвяравалі структурам Навальнага, пацярпелымі прызнаны толькі чацьвёра.
Навальны і яго паплечнікі лічаць гэтую справу палітычна матываванай. Выступаючы на судзе, Навальны сказаў, што «будзе працягваць змагацца з уладай» і не баіцца «ні ФСБ, ні хімічнай зброі, ні Пуціна».
- У канцы 2020 году апазыцыянэр Аляксей Навальны вярнуўся ў Маскву зь Нямеччыны, дзе некалькі месяцаў лячыўся і праходзіў рэабілітацыю пасьля атручэньня ў Расеі баявым хімічным рэчывам з групы «Навічок». З таго часу ён пазбаўлены волі: спачатку Навальнага арыштавалі, а затым суд адправіў яго ў калёнію ў крымінальнай справе 2014 году.
- Зь сярэдзіны сакавіка Аляксей Навальны знаходзіцца ў папраўчай калёніі № 2 у Пакрове Ўладзімірскай вобласьці РФ, дзе адбывае пакараньне ў справе аб махлярстве. Ён, ягоныя прыхільнікі і многія праваабарончыя арганізацыі лічаць крымінальную справу палітычнай.
