«Роскомнадзор» паабяцаў заблякаваць Instagram у Расеі апоўначы 14 сакавіка, паведамляе агенцтва РБК. Карыстальнікам дадуць двое сутак для пераносу фота і відэа на іншыя пляцоўкі.
«Паколькі для актыўных карыстальнікаў Instagram спатрэбіцца час для пераносу сваіх фота-і відэаматэрыялаў у іншыя сацыяльныя сеткі, апавяшчэньня сваіх кантактаў і падпісчыкаў, Роскомнадзор прыняў рашэньне аб завяршэньні працэдуры ўвядзеньня абмежаваньняў на доступ да Instagram у 00.00 гадзін 14 сакавіка, прадугледзеўшы для карыстальнікаў дадатковыя 48 гадзін пераходнага пэрыяду», — паведамляе ведамства.
Генэральная пракуратура запатрабавала ад Роскомнадзора заблякаваць Instagram і падала пазоў у суд аб прызнаньні кампаніі Meta экстрэмісцкай арганізацыяй.
Акрамя таго, галоўнае сьледчае ўпраўленьне СК распачало справу па артыкулах аб закліках да экстрэмізму і спрыяньні тэрарызму з прычыны рашэньня Meta не выдаляць паведамленьні ў Facebook і Instagram з заклікамі да «сьмерці расейскім захопнікам».
Кампанія Meta, якая валодае Facebook і Instagram, часова дазволіла карыстальнікам «у некаторых краінах» заклікаць у гэтых сацсетках да гвалту супраць расейскіх вайскоўцаў, паведамляе Reuters, спасылаючыся на ўнутраныя дакумэнты карпарацыі. Гэтую інфармацыю пацьвердзіў прэсавы сакратар кампаніі Эндзі Стоўн у Twitter.
У якасьці прыкладу формы «палітычнага самавыяўленьня» Стоўн прывёў лёзунг «Сьмерць расейскім захопнікам» або «Сьмерць расейскім акупантам». Такія выказваньні будуць дапускацца ў паведамленьнях жыхароў Армэніі, Азэрбайджану, Эстоніі, Грузіі, Вугоршчыны, Латвіі, Літвы, Польшчы, Румыніі, Расеі, Славаччыны і Ўкраіны. Прадстаўнік кампаніі дадаў, што адпаведныя заклікі на адрас цывільных асобаў мадэратары дазваляць ня будуць.
Беларусі ў сьпісе краінаў, дзе такія выказваньні ў Facebook і Instagram дазволеныя, няма.
Таксама ў Facebook і Instagram часова дазволілі публікаваць паведамленьні, якія заклікаюць да сьмерці Ўладзіміра Пуціна ці Аляксандра Лукашэнкі. Такія запісы змогуць рабіць карыстальнікі з Польшчы, Украіны і Расеі. Іх не забаняць, калі запісы не нясуць у сабе іншыя мэты і не апісваюць месцазнаходжаньне і мэтад забойства.
Расейскія дыпляматы ўжо асудзілі рашэньне Meta, назваўшы яго «экстрэмісцкай дзейнасьцю». «Дзеяньні кампаніі — яшчэ адно сьведчаньне абвешчанай нашай краіне інфармацыйнай вайны бяз правілаў. Патрабуем ад амэрыканскіх уладаў спыніць экстрэмісцкую дзейнасьць Meta і прыняць меры па прыцягненьні вінаватых да адказнасьці», — заявіла расейская амбасада ў ЗША.
