Ціханоўская заклікала пікетаваць Генэральны штаб а 17-й
Апазыцыйны лідэр Сьвятлана Ціханоўская, якая раней заявіла пра стварэньне пераходнага кабінэту, заклікала да мітынгу каля Генэральнага штабу на вуліцы Камуністычнай, 1 у Менску. На ім мае быць выстаўлена патрабаваньне беларускім афіцэрам спыніць рух войскаў ва Ўкраіну ў падтрымку Пуціна і расейскай агрэсіі супраць Украіны.
Адначасова з гэтым кіраўнік Народнага антыкрызіснага кіраўніцтва Павал Латушка заклікаў беларускіх афіцэраў не выконваць злачынных загадаў Лукашэнкі, які падтрымаў Пуціна ў вайне супраць Украіны. На гарады паўднёвых суседзяў зь беларускай тэрыторыі ляцелі ракеты. Бамбаваньні разбуралі стратэгічныя аб'екты і жылыя дамы, гінулі людзі, у тым ліку малыя дзеці.
Суўладальнік Альфа-банку Міхаіл Фрыдман у лісьце супрацоўнікам заклікаў спыніць кровапраліцьце ва Ўкраіне
«Я нарадзіўся ў Заходняй Украіне і жыў там да 17 гадоў. Мае бацькі — грамадзяне Ўкраіны і жывуць у Львове, маім любімым горадзе. Але я правёў большую частку майго жыцьця як грамадзянін Расеі, разьвіваючы бізнэс. Я глыбока прывязаны да ўкраінцаў і расейцаў і бачу гэты канфлікт як трагедыю для тых і другіх», — піша Фрыдман у лісьце, адрасаваным, як паведамляе Financial Times, супрацоўнікам інвэстыцыйнай фірмы LetterOne, суўладальнікам якой ён зьяўляецца, піша тэлеканал «Дождь».
З Фрыдманавых словаў, ён не выступае з палітычнымі заявамі, але нясе адказнасьць перад тысячамі супрацоўнікаў у Расеі і Ўкраіне і перакананы, што вайна ніколі ня можа быць рашэньнем. «Гэты крызіс будзе каштаваць жыцьцяў і прынясе разбурэньні абедзьвюм нацыям, якія былі братамі сотні гадоў», — піша Фрыдман.
«Пакуль рашэньне здаецца жахліва далёкім, я магу толькі далучыцца да тых, хто хоча спыненьня кровапраліцьця. Я ўпэўнены, што мае партнэры падзяляюць мой пункт гледжаньня», — піша бізнэсовец.
На просьбу прэзыдэнта Ўкраіны Швайцарыя хоча арганізаваць перамовы ў Жэнэве
Адзначаецца, што мэта перамоваў — спыненьне агню. Перамовы могуць адбыцца ўжо ў панядзелак у рамках пасяджэньня Рады ААН у правах чалавека ў Жэнэве, паведамляе tagesanzeiger.
Таксама паведамляюць, што прэзыдэнт Швайцарыі Іньяцыё Касіс кантактуе зь міністрам замежных справаў Расеі Сяргеем Лаўровым і прэзыдэнтам Украіны Ўладзімірам Зяленскім.
Акрамя таго, Фэдэральная рада плянуе правесьці спэцыяльную сэсію ў нядзелю або панядзелак для ўвядзеньня санкцыяў супраць Расеі.
Міністар лічбавай трансфармацыі Ўкраіны паведаміў, што ўкраінскія кібэрвойскі атакавалі сайт Нацыянальнага банку Беларусі
"Нацбанк Беларусі прылёг, як і дзясяткі іншых стратэгічных сайтаў. Украінскія кібэрспэцыялісты найлепшыя", — напісаў міністар Міхайла Фёдараў.
Каля пасольства Расеі ў Чэхіі праходзіць мітынг нязгодных з агрэсіяй Расеі супраць Украіны
Лія Ахеджакава супраць вайны, яна застаецца ў Расеі
Генпракуратура Расеі, паводле ТАСС, папярэдзіла расейцаў аб адказнасьці за аказаньне дапамогі на шкоду бясьпецы РФ.
Раней сёньня распаўсюджвалася інфармацыя, што вядомая расейская акторка Лія Ахеджакава ахвяравала $10 000 для ўкраінскай арміі. Аднак у размове са Свабодай акторка абвергла паведамленьне пра ахвяраваньне і пра свой ад'езд з Расеі.
Нідэрлянды закрываюць паветраную прастору для расейскіх самалётаў
Гэта ўжо 20-я краіна, якая прыняла такое рашэньне.
Дзеці і жанчыны ў Хмяльніцкім плятуць маскавальныя сьцены
Канцлер Нямеччыны Шольц: агрэсія Пуціна стала паваротным пунктам
Канцлер Нямеччыны Оляф Шольц выступіў на тэрміновай сэсіі Бундэстагу з прамовай, прысьвечанай расейскаму ўварваньню ва Ўкраіну.
Канцлер пацьвердзіў, што Нямеччына пачне пастаўкі Ўкраіне ўзбраеньня, бо «пуцінская агрэсія не пакінула нам іншага выбару». Раней Нямеччына не пагаджалася адпраўляць сваю зброю Ўкраіне.
Шольц пацьвердзіў, што супраць Расеі будуць узмацняцца жорсткія санкцыі ў выпадку працягу агрэсіі, і яны «не абмежаваныя ніякімі магчымымі лімітамі». Канцлер таксама заявіў аб рэзкім — амаль удвая — павелічэньні выдаткаў на нацыянальную абарону. Прымуць меры і для найхутчэйшага зьніжэньня залежнасьці ад паставак расейскага газу. У тым ліку пабудуюць два новыя тэрміналы для прыёму звадкаванага газу.
Кіеў: расейцы страцілі прыкладна 4300 салдатаў пры наступе на Ўкраіну
Намесьніца міністра абароны Ўкраіны Ганна Маляр прывяла статыстыку, якую мае ведамства на гэты час. Паводле яе, расейцы страцілі ў вайне ўжо 27 самалётаў і 26 верталётаў, 146 танкаў, 49 гармат і іншую вайсковую тэхніку. Інфармацыя пра 4300 страт асабовага складу ўдакладняецца.
Эўразьвяз сёньня на тэрміновым саміце разгледзіць дадатковую дапамогу Ўкраіне
Эўразьвяз разгледзіць дадатковыя меры падтрыманьня Ўкраіны. З гэтай мэтай Высокі прадстаўнік ЭЗ ў вонкавых справах і палітыцы бясьпекі Жузэп Бурэль склікаў нечарговую сустрэчу міністраў замежных справаў зьвязу, інфармуе reform.by.
«Я прапаную міністрам выкарыстоўваць Эўрапейскі фонд міру для дзьвюх мераў тэрміновай дапамогі. Яны накіраваныя на фінансаваньне паставак летальных матэрыялаў для гераічнай украінскай арміі, якая аказвае жорсткі супраціў расейскім акупантам, а таксама на забесьпячэньне тэрмінова неабходнымі нелетальнымі матэрыяламі, такімі як паліва», — паведаміў Бурэль.
Украіна афіцыйна зьвярнулася ў Міжнародны суд ААН з пазовам супраць Расеі
Прэзыдэнт Украіны Ўладзімір Зяленскі заявіў, што Ўкраіна афіцыйна накіравала пазоў супраць Расеі ў Міжнародны суд ААН у Гаазе.
«Патрабуем прыцягнуць Расею да адказнасьці за скажэньне паняцьця генацыду для апраўданьня агрэсіі. Просім суд тэрмінова загадаць Расеі спыніць вайсковыя дзеяньні і прызначыць слуханьні на наступны тыдзень», — паведаміў Зяленскі ў сваім Twitter.
Адначасова Вярхоўная рада Ўкраіны зьвярнулася да Генэральнай асамблеі ААН з прапановай стварыць спэцыяльны трыбунал для расьсьледаваньня злачынстваў рэжыму дзейнага прэзыдэнта Расеі Ўладзіміра Пуціна.
Нямеччына, Бэльгія, Швэцыя ды іншыя краіны закрываюць паветраную прастору для расейскіх самалётаў
- Нямеччына 27 лютага ў 17:00 на 3 месяцы закрывае неба для расейскіх самалётаў, паведамляе газэта Handelsblatt са спасылкай на нямецкае Міністэрства транспарту.
- Паветраную прастору закрые таксама Швэцыя, паведаміў у інтэрвію Швэдзкаму радыё міністар у пытаньнях ЭЗ Ханс Дальгрэн.
- «Ісьляндыя вырашыла закрыць сваю паветраную прастору для расейскага паветранага руху на знак салідарнасьці з Украінай», — заявіла кіраўніца МЗС краіны.
- Бэльгія закрывае паветраную прастору для ўсіх расейскіх авіякампаній, заявіў прэм’ер краіны.
- Ірляндыя закрые паветраную прастору для расейскіх самалётаў, паведаміў у твітэры міністар замежных спраў краіны Сайман Коўні.
- Неба для расейскіх самалётаў закрываюць таксама Італія, Аўстрыя і Данія.
Украіна атрымала вялікую партыю ракет «паветра — паветра»
«Ад нашых заходніх партнэраў для авіяцыі Паветраных сіл Узброеных сіл Украіны прыйшла вялікая партыя ракет клясы „паветра — паветра“. Яны ўжо пад крыламі нашых зьнішчальнікаў. Лётчыкі запэўніваюць, што на ўсіх акупантаў хопіць!» — напісаў тэлеграм-канал Вярхоўнай Рады Ўкраіны.
Украінскі парлямэнт падзякаваў замежным саюзьнікам за магутную падтрымку ва ўзбраеньні.
Гуманітарыі асудзілі расейскую агрэсію супраць Украіны
Праўленьне і Рада Міжнароднай асацыяцыі гуманітарыяў, якая ўключае навукоўцаў з Украіны, Расеі і Беларусі, асудзіла супрацьзаконнае ўварваньне расейскіх войскаў на тэрыторыю Ўкраіны і пачатак баявых дзеяньняў супраць украінскага народу:
«Грунтуючыся на гістарычных дадзеных і міжнародным праве, мы патрабуем павагі да сувэрэнітэту і тэрытарыяльнай цэласнасьці Ўкраіны як незалежнай дзяржавы. Мы смуткуем аб загінулых і заклікаем усіх разважных людзей зрабіць усё магчымае, каб спыніць гэтую вайну», – гаворыцца ў заяве.
Больш за 200 вядомых комікаў падпісалі адкрыты зварот да Пуціна супраць вайны ва Ўкраіне
Сярод тых, хто падпісаў, беларусы Слава Камісаранка і Ідрак Мірзалізадэ, Міхаіл Шац, Аляксандар Далгаполаў і іншыя.
Агенцтва ААН паведаміла аб ахвярах сярод мірнага насельніцтва Ўкраіны
Як мінімум 64 мірныя жыхары Ўкраіны былі забітыя і больш за 160 тысяч сталі ўцекачамі ў выніку ўварваньня расейскіх войскаў. Аб гэтым заявіла Упраўленьне па каардынацыі гуманітарных пытаньняў ААН (УКГП). Пры гэтым паведамляецца, што, як мяркуецца, колькасьць ахвяр «значна большая».
У выніку пашкоджаньняў грамадзянскай інфраструктуры, сотні тысяч украінцаў засталіся без вады і электраэнэргіі. Сотні дамоў пашкоджаны і зьнішчаны. Пашкоджаньні дарог і мастоў прывялі да ізаляцыі некаторых населеных пунктаў.
Міжнародная фэдэрацыя дзюдо пазбавіла Пуціна статусу ганаровага прэзыдэнта і амбасадара Фэдэрацыі
У афіцыйнай заяве сказана: «У сьвятле ваеннага канфлікту ва Ўкраіне, які працягваецца, Міжнародная фэдэрацыя дзюдо аб'яўляе аб прыпыненьні статусу Ўладзіміра Пуціна ў якасьці ганаровага прэзыдэнта і амбасадара Міжнароднай фэдэрацыі дзюдо».
Пратэст супраць вайны ў бюлетэнях
Ужо зараз па ўсёй Беларусі людзі, якія прыходзяць на выбарчыя ўчасткі на рэфэрэндум аб зьмяненьнях у Канстытуцыі, пакідаюць у бюлетэнях антываенныя допісы, пратэстуючы супраць агрэсіі ва Ўкраіне, якую Расея разьвязала пры дапамозе Лукашэнкі. На 14-ю гадзіну прызначаны збор людзей каля сваіх выбарчых участкаў дзеля гучнага пратэсту супраць нелегітымных рашэньняў уладаў і вайны з Украінай.