«Упершыню ў гісторыі». ЭЗ прадаставіць Украіне летальную зброю на 450 млн эўра

Эўразьвяз пагадзіўся выдзеліць Узброеным сілам Украіны летальную зброю на 450 мільёнаў эўра для барацьбы з расейскім уварваньнем.

Пра гэта паведаміў міністар замежных спраў ЭЗ Жузэп Бурэль пасьля нефармальнай сустрэчы міністраў замежных спраў краін-чальцоў, піша «Європейська правда».

«Мы вырашылі даць летальную зброю ўкраінскай арміі на 450 мільёнаў эўра і пакет на яшчэ 50 мільёнаў на нелетальную дапамогу: паліва, сродкі абароны. Мы робім гэта ўпершыню ў гісторыі. Усе краіны пагадзіліся або, па меншай меры, не адмаўлялі рашэньне», — сказаў Бурэль

28 лютага зьбярэцца экстраная сэсія Генасамблеі ААН

Рада бясьпекі ААН падтрымала рэзалюцыю аб скліканьні экстранай спэцыяльнай сэсіі Генэральнай асамблеі з прычыны ўварваньня Расеі ва Ўкраіну. Сэсія павінна адбыцца 28 лютага.

Галасаваньне рады, у якую ўваходзяць 15 чальцоў, было працэдурным, таму Расея не магла накласьці вета. Рашэньне аб скліканьні сэсіі Генэральнай асамблеі было прынята 11 галасамі «за». Расея прагаласавала супраць, а Кітай, Індыя і Аб'яднаныя Арабскія Эміраты ўстрымаліся.

Сустрэча павінна даць усім 193 членам Генасамблеі права выказаць сваё меркаваньне аб нападзе Расеі на Ўкраіну.

25 лютага Расея наклала вета на рашэньне Савета бясьпекі аб перадачы рэзалюцыі супраць уварваньня Расеі ва Украіну на разгляд Генасамблеі.

26 лютага прэзыдэнт Украіны Уладзімір Зяленскі зьвярнуўся да генэральнага сакратара ААН з просьбай забраць у Расеі права голасу ў Савеце бясьпекі ААН.

FIFA і FIDE забаранілі праводзіць матчы і спаборніцтвы ў Расеі

Міжнародная фэдэрацыя футбола (FIFA) увяла санкцыі ў дачыненьні да Расеі ў сувязі з ваеннай агрэсіяй супраць Украіны. З гэтага часу зборная Расеі па футболе будзе называцца «Расейскі футбольны саюз» і праводзіць свае матчы толькі на нэўтральных палях. Акрамя таго, камандзе забараняецца выкарыстоўваць нацыянальны сьцяг і гімн.

Санкцыі ўвяла таксама Сусьветная шахматная фэдэрацыя, забараніўшы ўсе спаборніцтвы, якія праводзяцца пад сваёй эгідай, на тэрыторыі Расеі.

Раней нацыянальныя футбольныя каманды Польшчы, Швэцыі і Чэхіі адмовіліся гуляць са зборнай Расеі за права выхаду на чэмпіянат сьвету, які адбудзецца сёлета ў Катары. Пры гэтым каманды заявілі, што ня выйдуць на гульні супраць Расеі, якія павінны былі прайсьці вясной у Маскве, нават калі FIFA перанясе іх на нэўтральныя палі.

Турцыя абмяжуе праход расейскіх караблёў па пралівах у Чорнае мора

Турцыя ў нядзелю паведаміла аб рашэньні выканаць палажэньні міжнароднай Канвэнцыі Мантро, якое дазволіць абмежаваць рух расейскіх ваенных караблёў з Міжземнага мора ў Чорнае.

Пра гэта ў інтэрвію CNN Turk заявіў міністар замежных спраў Турцыі Мэўлют Чавушаглу. Упершыню з пачатку расейскага ваеннага ўварваньня ва Ўкраіну 24 лютага прадстаўнік кіраўніцтва Турцыі, якая ўваходзіць у NATO, назваў сытуацыю ва Ўкраіне вайной. Гэтым Чавушаглу прыкметна зьмяніў рыторыку Анкары, якая да гэтага часу камэнтавала падзеі вельмі асьцярожна, балянсуючы паміж сваімі абавязацельствамі перад заходнімі саюзьнікамі і цеснымі кантактамі з Масквой, піша Reuters.

Кіеў: за чатыры дні расейскай агрэсіі ва Ўкраіне загінулі 352 цывільныя асобы і яшчэ 1684 атрымалі раненьні

Міністэрства аховы здароўя Ўкраіны абнародавала апэратыўныя зьвесткі аб колькасьці ахвяр сярод мірнага насельніцтва ў выніку чатырох дзён вайсковай агрэсіі Расеі на Ўкраіну.

Папярэдне загінулі 352 цывільныя асобы, у тым ліку 16 дзяцей, і яшчэ 1684 атрымалі раненьні, у тым ліку –116 дзяцей.

KFC і McDonald’s ва Ўкраіне пачалі пастаўляць ежу вайскоўцам і шпіталям

Сеткі фастфудаў KFC і McDonald's пачалі пастаўляць прадукты ў падтрымку ўкраінцаў і ўкраінскай арміі. Пра гэта гаворыцца ў Instagram кампаній.

У McDonaldʼs паведамілі, што перадаюць прадукты, якія не патрабуюць прыгатаваньня, мясцовым саветам. У KFC заявілі пра пастаўку ежу ваенным, тэрытарыяльнай абароне, ваенным шпіталям і бальніцам.

Міністэрства абароны Казахстана абвергла інфармацыю аб адпраўцы вайскоўцаў ва Ўкраіну

«Інфармацыя, якая распаўсюджваецца ў сацыяльных сетках, датычна нібы накіраваньня казахстанскіх вайскоўцаў ва Ўкраіну не адпавядае рэчаіснасьці», – гаворыцца ў заяве Мінабароны Казахстана.

У ведамстве ўдакладнілі, падобных запытаў аб дапамозе кіраўніцтву краіны не паступала.

Урад Швэцыі перадасьць Украіне 43 мільёны даляраў фінансавай дапамогі і вайсковы рыштунак

Швэцыя перадасьць Украіне 43 мільёны даляраў фінансавай дапамогі, 135 тысяч палявых пайкоў, 5 тысяч касак, 5 тысяч бронекамізэлек і 5 тысяч аднаразовых супрацьтанкавых гранатамётаў. Пра гэта паведаміла прэм’ер-міністарка краіны Магдалена Андэрсан.

Дзеяньні прэзыдэнта Зяленскага падтрымліваюць больш за 90% украінцаў, — апытаньне

Дзеяньні прэзыдэнта Ўкраіны Ўладзіміра Зяленскага падтрымліваюць больш за 90% апытаных. Такія вынікі апытаньня, праведзенага сацыялягічнай групай «Рэйтынг» 26–27 лютага 2022 году.

Паводле апытаньня, 91% украінцаў падтрымліваюць дзеяньні прэзыдэнта Зяленскага, з іх 59% — цалкам падтрымліваюць, 32% — хутчэй падтрымліваюць. Не падтрымліваюць — 6%, не змаглі адказаць — 3%. Пры гэтым група «Рэйтынг» адзначае, што са сьнежня 2021 году падтрымка дзеяньняў прэзыдэнта Ўкраіны вырасла ўтрая.

Ува ўсіх рэгіёнах краіны назіраецца надзвычай высокі ўзровень падтрымкі Зяленскага: на Захадзе і ў Цэнтры (больш за 90%), на Ўсходзе і Поўдні — больш за 80%.

Да вечара 27 лютага пэтыцыю супраць ваенных дзеяньняў ва Ўкраіне падпісалі больш за 900 тысяч расейцаў

Пэтыцыя, створаная расейскім праваабаронцам Львом Панамаровым, разьмешчана на сайце Change.org.

Свае звароты таксама апублікавалі расейскія акторы-комікі, дызайнэры і ілюстратары, прадстаўнікі расейскай індустрыі моды і прыгажосьці, выпускнікі і супрацоўнікі НДУ ВШЭ, прадстаўнікі расейскай ІТ-індустрыі, падкаст-індустрыі, псыхалягічная і псыхіятрычная супольнасьці Расеі, Маладыя расейскія навукоўцы і асобна навукоўцы-эканамісты, сябры рады Фэдэральнай палаты адвакатаў Расеі, паведамляе «Новая газета».

Міністар аховы здароўя Украіны: за чатыры дні масавых абстрэлаў Расеі загінулі 16 украінскіх дзяцей

У Міністэрcтве аховы здароўя Ўкраіны паведамілі пра гібель 16 дзяцей за чатыры дні ваеннай агрэсіі Расеі супраць Украіны.

У той жа час поўнай інфармацыі аб стратах няма, бо ў большасьці гарадоў, атакаваных расейскімі войскамі, працягваюцца і вулічныя баі, і артылерыйскія абстрэлы.

Паводле міністра аховы здароўя Ўкраіны Віктара Ляшка, на позьні вечар 26 лютага паводле апэратыўных зьвестак загінулі 198 асобаў і 1115 атрымалі раненьні, у тым ліку 33 дзіцяці.

У сталіцы Ўкраіны ў выніку баявых дзеяньняў у ноч на 27 лютага загінуў 31 чалавек і 106 атрымалі раненьні.

Брытанская bp пазбудзецца долі ў расейскай кампаніі «Роснефть»

Рада дырэктараў bp (колішняя British Petroleum) вырашыла пазбыцца долі ў 19,75% акцыяў кампаніі «Роснефть», якою кампанія валодала з 2013 году, гаворыцца ў яе заяве. Двое прадстаўнікоў bp, у тым ліку генэральны дырэктар Бэрнард Луні, пакінуць раду дырэктараў НК «Роснефть».

Міністэрства абароны Расеі ўпершыню паведаміла аб стратах ва Ўкраіне

Паводле афіцыйнага прадстаўніка Міністэрства абароны генэрал-маёра Ігара Канашэнкава, страты УС Расеі шматкроць меншыя за колькасьць «зьнішчаных нацыяналістаў» (так улады Расеі называюць украінскіх салдатаў. — РС).

«Расейскія вайскоўцы праяўляюць мужнасьць і гераізм у ходзе выкананьня баявых задач спэцыяльнай ваеннай апэрацыі»

«На жаль, ёсьць загінулыя і параненыя нашы таварышы», — сказаў Канашэнкаў. Іх колькасьць прадстаўнік Міністэрства абароны не ўдакладніў.

«Расейскімі ўзброенымі сіламі з пачатку спэцыяльнай ваеннай апэрацыі пашкоджаныя 1067 аб’ектаў вайсковай інфраструктуры Ўкраіны», — сказаў ён.

Эўразьвяз цалкам закрывае паветраную прастору супольнасьці для Расеі, заявіла кіраўніца Эўракамісіі Урзуля фон дэр Ляен.

Дураў: Працу Telegram-каналаў на час канфлікту могуць часткова ці цалкам абмежаваць

Заснавальнік Telegram Павел Дураў заклікаў карыстальнікаў з Расеі і Ўкраіны «з сумневам ставіцца да любых зьвестак, якія пашыраюцца ў Telegram у гэты час».

«Telegram-каналы ўсё часьцей робяцца крыніцай неправеранай інфармацыі, зьвязанай з украінскімі падзеямі», — напісаў Дураў.

Ён адзначыў, што кампанія ня мае фізычнай магчымасьці правяраць усе публікацыі каналаў на дакладнасьць.

«У выпадку эскаляцыі сытуацыі мы разгледзім магчымасьць часткова ці цалкам абмежаваць працу Telegram-каналаў ва ўцягнутых краінах на час канфлікту», — заявіў Павел Дураў.

Міністры замежных справаў краін Групы сямёх (G7) 27 лютага зрабілі сумесную заяву

• G7 зьбіраецца адключыць пэўныя расейскія банкі ад SWIFT. Краіны «сямёркі» разьлічваюць, што гэта абмяжуе здольнасьць банкаў «дзейнічаць у глябальным маштабе».
• «Сямёрка» можа ўвесьці абмежаваньні для Банку Расеі. У G7 лічаць, што гэта перашкодзіць ЦБ РФ выкарыстоўваць свае міжнародныя рэзэрвы так, каб зьменшыць эфэкт санкцыяў.
• Група сямёх мерыцца абмежаваць расейцам магчымасьці атрымліваць «залатыя пашпарты».
• G7 плянуе стварыць на гэтым тыдні трансатлянтычную працоўную групу для назіраньня за выкананьнем фінансавых санкцыяў супраць РФ.
• Правядуць «інвэнтарызацыю і замарожваньне авуараў фізычных асобаў і прадпрыемстваў, якія падлягаюць санкцыям у краінах «сямёркі».
• Удзельнікі групы маюць намер таксама «ўжыць санкцыі і іншыя меры фінансавага характару да чыноўнікаў і прадстаўнікоў расійскай эліты, блізкіх да ўраду, а таксама да іх сем’яў».
• Краіны G7 дамовіліся ўзмацніць каардынацыю для барацьбы з «дэзынфармацыяй і іншымі формамі гібрыднай вайны».

«Пратэстуйце». Да беларусаў зьвярнуўся лідэр «Океану Ельзи» Сьвятаслаў Вакарчук

Ён папрасіў зрабіць усё, каб беларускіх салдатаў не было ва Украіне.

«Я бачыў вашыя шчырыя ўсьмешкі. Непадробную любоў. Я памятаю, як дзясяткі тысяч сьпявалі з намі ва ўнісон «Я ня здамся бяз бою». Таму асабліва жахліва разумець сёньня, што два дыктатары ўцягваюць у вайну супраць Украіны і беларусаў. Лукашэнка і так ужо саўдзельнік злачынстваў, але зараз ён хоча выпацкаць украінскай крывёй і вашых сыноў. Я памятаю, як вы 2 гады таму змагаліся за вашу свабоду, што ў вашых беларускіх сэрцах чуюць наш украінскі голас, таму зараз я зьвяртаюся да вас — пратэстуйце. Зрабіце нешта, каб спыніць непапраўнае. Вы маеце шанец зрабіць гэта. Мы чакаем ад вас. Мы спадзяемся на вас, беларусы».

Канада закрыла паветраную прастору для расейскіх самалётаў

Гэта адбылося праз уварваньне Расеі ва Ўкраіну, заявіў у нядзелю міністар транспарту Канады. Канада далучылася да іншых краін, якія аб’явілі аб аналягічных мерах у адказ на ўварваньне Расеі ва Ўкраіну, паведмляе Reuters.

Спартоўцы Нямеччыны заклікалі сьвет выключыць Расею і Беларусь зь міжнароднага спорту

У сувязі зь неаднаразовым парушэньнем Расеяй алімпійскага перамір’я ў 2008, 2014 і 2022 гадах нямецкае аб’яднаньне Athleten Deutschland прапануе ўсім міжнародным і нацыянальным спартовым фэдэрацыям выступіць з адзінай пазыцыяй, дакладна сфармуляваўшы і асудзіўшы агрэсіўную вайну Расеі супраць Украіны і ўдзел у ёй Беларусі.

Сярод прапанаваных штрафных захадаў — «поўнае выключэньне расейскіх і беларускіх фэдэрацыяў, уключаючы расейскі і беларускі нацыянальныя алімпійскія і паралімпійскія камітэты, зь міжнароднай спартовай сыстэмы», аднабаковае спыненьне ўсіх фінансавых сувязяў з расейскімі донарамі, выключэньне ўсіх беларускіх і расейскіх чыноўнікаў зь міжнароднай спартовай сыстэмы і ўнясеньне іх у адпаведныя санкцыйныя сьпісы, адхіленьне ўсіх спартоўцаў з РФ і РБ ад любых спаборніцтваў, адмена ўсіх спаборніцтваў ці трэнаваньняў, заплянаваных на тэрыторыі Расеі і Беларусі.

У выніку расейскага нападу згарэў найбольшы ў сьвеце самалёт «Мрія»

У выніку паветранага нападу расейскіх войскаў на аэрапорт Гастомель пад Кіевам спалены адзін з самых вялікіх і магутных самалётаў у сьвеце — АН-225 «Мрія» ўкраінскай вытворчасьці, які існаваў у адзіным экзэмпляры.

Пра гэта Радыё Свабода паведамілі дзьве інфармаваныя крыніцы на прадпрыемстве «Антонаў» і пацьвердзіў гарадзкі галава гораду Буча.