«Кажуць, што вось цяпер у нас высадзіўся дэсант», — беларускі пісьменьнік, які жыве пад Кіевам
Размова зь беларускім пісьменьнікам Сяргеем Прылуцкім, які жыве ў кіеўскім прадмесьці Буча, непадалёк ад аэрапорта Гастомель, за які 25 лютага ішоў зацяты бой.
— Хвілін 10–15 таму моцна біла артылерыя. Ня ведаю па чым, але знаёмыя сказалі па тэлефоне, што нібыта зноў высадзіўся дэсант у Бучы і атакуе з боку Беларусі. Я падазраю, што гэта фігачаць калёну, якая ідзе ў наш бок…
Банк БелВЭБ папярэдзіў кліентаў пра абмежаваньне апэрацый на картках з-за санкцый
«Дарагія кліенты. Банк БелВЭБ адным з першых банкаў сутыкнуўся з наступствамі санкцый ЭЗ і ЗША. Для вас надзвычай важна застацца сумленнымі з Вамі, спадзяемся на разуменьне з вашага боку», — гаворыцца ў паведамленьні.
Вайсковы экспэрт: «Дакладных стратаў з абодвух бакоў мы не даведаемся»
Зьяўленьне авіяцыі, ракетнай тэхнікі, высокадакладнай зброі, бесьпілётнікаў унесьлі свае карэктывы і, на думку вайсковага экспэрта Аляксандра Алесіна, нейкай унівэрсальнай формулы для вылічэньня стратаў абодвух бакоў цяпер не існуе.
— Інфармацыя ўвогуле вельмі супярэчлівая. Гэтак прынята ў вайсковай справе — утойваць свае страты і перабольшваць страты праціўніка. Я мяркую, што пакуль страты расейскага боку не такія крытычныя, каб ён спыніў сваю апэрацыю».
«Без дапамогі нікога не пакінем»: Польшча прыняла 100 тысяч чалавек з Украіны
Ад 24 лютага ў краіну ўехалі 100 тысяч чалавек з Украіны, паведамляе Памежная служба Польшчы.
«Учора быў рэкордны дзень, супрацоўнікі Памежнай службы прапусьцілі больш за 47 тысяч чалавек. Усім дапаможам, без дапамогі нікога не пакінем», – сказаў галоўны камэндант Памежнай службы Польшчы.
Офіс прэзыдэнта Ўкраіны назваў лічбы стратаў расейскага войска
«Паводле нашых ацэнак, сярод расейскіх вайскоўцаў каля 3 000 чалавек забітымі і параненым. Сярод іх больш як 1000 забітых. 200 палонных», – сказаў дарадца Офісу прэзыдэнта Ўкраіны Аляксей Арастовіч.
Колькасьць забітых украінскіх вайскоўцаў у Генштабе не называюць.
На месцы бою з расейскімі дывэрсантамі ў Кіеве
Украінскія вайскоўцы і службы хуткага рэагаваньня стаяць ля пашкоджанай машыны ў Кіеве на месцы баёў з расейскімі войскамі пасьля таго, як Расея пачала ваенную апэрацыю супраць Украіны.
Міністэрства здароўя Польшчы: 120 лякарняў заявілі аб гатоўнасьці дапамагчы параненым украінцам
«Маем каля 70 тысяч месцаў, прызначаных для людзей, якім патрабуецца хірургічная або артапэдычная апэрацыя. Могуць паступіць людзі з апёкамі, якім патрэбная дапамога», парадае PAP словы намесьніка міністра аховы здароўя Польшчы.
Gazeta Wyborcza параўновае Пуціна з Гітлерам і Сталіным
У рэдакцыйным камэнтары польская Gazeta Wyborcza піша, што «ўзброены паход на Кіеў, нягледзячы на калясальную дыспрапорцыю ваеннага патэнцыялу Расеі і Ўкраіны, ня выявіўся для Пуціна прагулкай, як і ня быў прагулкай для Вермахта ў верасьні 1939 года ў Польшчу»:
«Аналёгій між тым, што адбылося больш за 80 гадоў таму, і падзеямі апошніх дзён, безумоўна, больш. Лідэр Крамля, як калісьці Гітлер, не хаваў сваіх агрэсіўных намераў і, падобна фюрэру Трэцяга рэйха, любіць прыбірацца ў пёры абаронцы парадку і «правільных» правоў сваіх суайчыньнікаў, якіх нібыта яны пазбаўлены уладамі ў Кіеве. Захад ужо ведае, што крамлёўскі вар’ят ня спыніцца на ўкраінскай мяжы. Ён падобна свайму ідэалягічнаму папярэдніку Сталіну, захоча аднавіць імпэрыю».
Палякі ня хочуць гуляць з расейцамі ў футбол
Прэзыдэнт Польшчы Анджэй Дуда мяркуе, што «няма чаго гуляць з бандытамі».
Польскі футбольны зьвяз афіцыйна зьвярнуўся ў Міжнародную фэдэрацыю футболу з заявай аб тым, што зборная Польшчы адмаўляецца выходзіць на поле ў матчы з расейцамі, які павінен вызначыць удзельніка чэмпіянату сьвету, што пройдзе ў Катары.
У буйных гарадах Украіны ідуць вулічныя баі
У Кіеве, Харкаве, Запарожжы, Сумах ідуць вулічныя баі, аддзелы самаабароны пры дапамозе мясцовых жыхароў затрымліваюць дывэрсантаў.
Як паведамляюць мясцовыя ўлады, найчасьцей іх затрымліваюць пры спробе нанесьці асаблівыя пазнакі-арыентыры. Кіеўская гарадзкая адміністрацыя паведаміла, што такіх балістычных арыентыраў шмат.
«А сёньня кіяўляне зьнялі, як пазначаюць газавыя трубы на шматкватэрных дамах. Будзьце пільныя! Як толькі гэта пабачыце, неадкладна зьвяртайцеся ў паліцыю!», — паведамілі ўлады.
У большасьці гарадоў, дзе ідуць баі, улады пераносяць пачатак камэнданцкай гадзіны на ранейшы час, дзе з 17.00, а дзе з 18.00. «Усе цывільныя асобы, якія будуць на вуліцы ў камэнданцкую гадзіну, будуць лічыцца ўдзельнікамі дывэрсійна-выведных групаў ворага», — заявіў мэр Кіева Віталь Клічко.
Францыя затрымала ў праліве Ля-Манш расейскі карабель
Францускія ВМС затрымалі ў праліве Ля-Манш расейскі грузавы карабель, які накіроўваўся ў Санкт-Пецярбург.
Улады Францыі паведамілі, што гэта 127-мэтровы карабель Baltic Leader, які перавозіў аўтамабілі. Вадаплаў перанакіравалі ў порт Булёнь-сюр-Мэр.
Рашэньне затрымаць карабель прынялі на запыт францускага ўраду. Там мяркуюць, што ён можа належаць кампаніі, якая трапіла пад санкцыі Захаду.
Расейскае агенцтва «РИА Новости» паведамляе, што расейская амбасада ў Францыі запатрабавала тлумачэньняў у сувязі з затрыманьнем вадаплаву.
Памежная служба Ўкраіны абвінаваціла Беларусь у вядзеньні вайны разам з Расеяй: «Будзьце вы праклятыя»
Старшыня Дзяржаўнай памежнай службы Ўкраіны Сяргей Дэйнэка накіраваў ліст кіраўніку Дзяржаўнага памежнага камітэту Беларусі.
«Рэспубліка Беларусь разам з Расейскай Фэдэрацыяй вядзе вайну супраць Украіны, ігнаруючы палажэньні міжнароднага права, элемэнтарныя нормы людзкой маралі і каштоўнасьць жыцьця. Зь першых дзён крывавага расейскага ўварваньня ва Ўкраіну Беларусь актыўна падтрымлівае краіну-агрэсара. Калёны тэхнікі атакавалі не толькі з Расеі, але і з краіны, якая ператварылася на сатэліта Расеі. Да гэтага дадаецца выкарыстаньне баявой авіяцыі, артылерыі, балістычных ракет і іншых сродкаў з тэрыторыі Беларусі», — заявіў Сяргей Дэйнэка ў лісьце, паведамляе прэс-служба Дзяржаўнай памежнай службы Ўкраіны.
«Я таксама магу дадаць — вы ня вартыя называць сябе памежнікамі», — сказаў ён.
«Мы пераможам! — напісаў Сяргей Дэйнэка і дадаў па-расейску: — Будьте вы прокляты, твари! С презрением!».
У Чарнігаве гарыць жылы дом на вуліцы Бялова
Парлямэнт Украіны патрабуе выключыць Расею з складу Рады бясьпекі ААН
Кіраўнік Вярхоўнай Рады Ўкраіны Руслан Стэфанчук выступіў з заявай ад імя ўсіх парлямэнцкіх фракцыяў Украіны з заклікам асудзіць і пакараць Расею як тэрарыстычную дзяржаву.
Зварот распаўсюдзіла дэпутатка Ірына Герашчанка.
«Апошнія дзеяньні Расейскай Фэдэрацыі, якая працягвае поўнамаштабную вайну супраць сувэрэннай Украіны, можна расцаніць толькі як міжнародны тэрарызм, — заявіў Стэфанчук. — Мірная і міралюбная, дэмакратычная, эўрапейская Ўкраіна сёньня трымае абарону ад самай жорсткай арміі ў сьвеце. Дзеяньні Расеі — гэта злачынствы супраць міру і чалавечнасьці, яны зьяўляюцца ваеннымі злачынствамі».
«Мы заклікаем выключыць Расею з Рады бясьпекі ААН. Краіна-тэрарыст ня мае права там знаходзіцца і разбураць асновы ўсясьветнай бясьпекі».
МУС Украіны: толькі ў Кіеве выдалі больш як 25 тысяч аўтаматаў
Міністар унутраных справаў Дзяніс Манастырскі заявіў, што толькі ў Кіеве жыхары атрымалі больш за 25 тысяч аўтаматаў і каля 10 мільёнаў патронаў, а таксама РПГ.
«Кіеў адназначна будзе абараняцца. Абараняцца і змагацца да апошняга. Я хачу адзначыць высокую самаарганізаванасьць нашых людзей. Я ганаруся, калі бачу, як яны бароняць свае гарады, мястэчкі, вуліцы і дамы. Самаарганізоўваюцца, каб не было марадэраў і крадзяжоў, бо паліцыя цяпер займаецца супрацьдзеяньнем дывэрсійным групам», — заявіў міністар.
«Мы забясьпечваем разам з вайскоўцамі надзейны тыл», — дадаў ён.
Лукашэнка загаварыў пра мірныя перамовы
Аляксандар Лукашэнка заявіў, што Беларусь гатовая даць пляцоўку і забясьпечыць правядзеньне мірных перамоваў аб урэгуляваньні сытуацыі ва Ўкраіне.
«Вось сёньня няхай прыяжджаюць. Поўнасьцю забясьпечым і дапаможам у гэтым пляне, каб перадухіліць вайну і мясарубку», — цытуе Лукашэнку БелТА.
Нагадаем, што агонь расейскіх войскаў па аб’ектах ва Ўкраіне, а таксама рух калёнаў захопнікаў ва Ўкраіну вядзецца ў тым ліку з тэрыторыі Беларусі.
Улады Ўкраіны абвінавацілі Беларусь у сумесным за Расеяй вядзеньні вайны супраць іх.
СБУ: у Данецку плянуюць падарваць ёмістасьці з хімікатамі
Служба бясьпекі Ўкраіны заяўляе са спасылкай на апэратыўныя выведныя зьвесткі аб рыхтаваньні правакацыі на тэрыторыі акупаванага Данецку.
«Там акупанты раздаюць процігазы мясцовым баевікам і расейскім вайскоўцам. Ёсьць імавернасьць правакацыі — падрыву прамысловых ёмістасьцяў зь хімічнымі рэчывамі», — адзначае СБУ ў заяве.
Паводле інфармацыі СБУ, у гэтай дывэрсіі супраць цывільнага насельніцтва плянуюць абвінаваціць украінскіх вайскоўцаў.
«Мы заяўляем, што, адрозна ад расейскіх акупантаў, Украіна ня дзейнічае такімі мэтадамі. Заклікаем нашых грамадзян на часова акупаванай тэрыторыі быць пільнымі!»
Беларусы нясуць кветкі да амбасады Ўкраіны ў Менску. ФОТА
Адміністрацыя пацьвердзіла гібель 7-гадовай дзяўчынкі ў Сумскай вобласьці
Вядома, што дзяўчынку звалі Аліса, ёй было 7 гадоў. Яна загінула ад раненьняў, якія атрымала ў выніку трапленьня расейскага снарада ў дзіцячы садок у горадзе Ахтырка Сумскай вобласьці Ўкраіны. Дзіця адвезьлі ў лякарню, але там Аліса памерла.
Абласная пракуратура Сумскай вобласьці пачала дасудовае сьледзтва па ч. 2 арт. 438 Крымінальнага кодэксу Ўкраіны (парушэньне законаў і звычаяў вайны).
Ганаровы консул Беларусі ў Львове склаў паўнамоцтвы на знак пратэсту супраць падтрымкі Беларусі агрэсіі Расеі ва Ўкраіну
«З учорашняга дня ў адпаведных абставінах я склаў зь сябе свае паўнамоцтвы», — сказаў Свабодзе Ігар Драцяк.
