Літва закрыла паветраную прастору для расейскіх самалётаў
Раней тое ж самае зрабілі Польшча, Чэхія, Баўгарыя, Латвія і Эстонія.
Брытанскае Міністэрства абароны апублікавала ацэнку ваенных дзеяньняў ва Ўкраіне
Міністэрства абароны Вялікай Брытаніі апублікавала кароткае паведамленьне з ацэнкай брытанскай выведкі наконт сытуацыі ва Ўкраіне пасьля расейскага нападу па стане на 26 лютага. У ацэнцы 4 пункты.
- Хуткасьць расейскага прасоўваньня запаволілася, верагодна, у выніку вострых праблем з лягістыкай і моцным украінскім супрацівам
- Расейскія сілы абыходзяць асноўныя населеныя пункты Ўкраіны, пакідаючы сілы, каб атачыць і ізаляваць іх
- У начных баях у Кіева, верагодна, удзельнічала абмежаваная колькасьць загадзя разьмешчаных расейскіх дывэрсійных групаў
- Захоп Кіева застаецца галоўнай ваеннай мэтай Расеі
Instagram стаў пазначаць акаўнты і допісы расейскіх прапагандысцкіх рэсурсаў
Пры такіх акаўнтах і допісах цяпер зьяўляецца надпіс: Russian state-controlled media («Падкантрольнае Расейскай дзяржаве выданьне»).
Кіеў разбурыў чыгуначныя пераходы паміж Украінай і Расеяй
Украіна зьнішчыла ўсе чыгуначныя пераходы паміж Украінай і Расеяй ды спыніла дыспэтчарскую сувязь з РФ. Пра гэта паведаміла «Укрзалізниця», дзяржаўнае прадпрыемства, якое займаецца пасажырскімі і грузавымі перавозамі на чыгунцы.
Тры ўкраінскія мабільныя апэратары заблякавалі доступ беларускім абанэнтам
Як паведамілі ў Тэлеграм-канале Вярхоўнай Рады Ўкраіны, «Київстар», Vodafone і lifecell заблякавалі доступ да сваіх сетак для абанэнтаў з РФ і Беларусі.
Дзяржаўны сакратар ЗША і кіраўнік дыпляматыі Эўразьвязу апублікавалі звароты па-расейску
Дзяржаўны сакратар ЗША Энтані Блінкен і кіраўнік дыпляматыі Эўразьвязу Жузэп Бурэль запісалі звароты да расейскага народу і апублікавалі допісы на расейскай мове ў Твітэры.
«Мы ведаем, што мільёны расейцаў ня хочуць вайны. Я шчыра жадаю, каб ваш лідэр спыніў гэтую братазабойчую вайну», — напісаў Бурэль.
«Народу Расеі: вы заслугоўваеце таго, каб жыць у міры і годнасьці, як і ўкраінцы. Як і ўсе людзі дзе б ні было», — напісаў Блінкен.
Чарнобыльская АЭС працуе, пэрсанал — закладнікі ў расейцаў
Пра гэта паведамляе ўкраінскае выданьне «Суспільне», цытуючы прэс-сакратарку Дзяржаўнага агенцтва Ўкраіны для кіраваньня зонай адчужэньня Яўгенію Кузьняцову. Сама станцыя працуе ў плянавым рэжыме.
«Некалькі дзясяткаў людзей не выпускаюць. Ратацыю не дазваляюць. Іх кормяць, пэрсанал гатуе сабе сам з прадуктаў, якія былі ў сталоўцы. Дазваляюць ім есьці і дапускаюць да працоўных месцаў. Расейскія вайскоўцы рыхтуюць сабе з нашых прадуктаў, але прывезьлі з сабой уласнага кухара», — распавяла прэс-сакратарка.
BILD: Канцлер Нямеччыны дазволіў саюзьнікам пастаўляць нямецкую зброю Ўкраіне
Канцлер Нямеччыны Оляф Шольц дазволіў партнэрам у NATO і краінам Эўразьвязу пастаўляць Украіне зброю нямецкай вытворчасьці, паведамляе нямецкае выданьне BILD. У прыватнасьці, урад Нямеччыны дазволіў Нідэрляндам адправіць 400 рэактыўных гранатамётаў украінскім вайскоўцам.
Больш за 150 тысяч украінцаў уцяклі ад вайны ў суседнія краіны, — ААН
150 тысяч уцекачоў выехалі з Украіны ў суседнія дзяржавы, большасьць зь іх у Польшчу, паведаміў Высокі камісар ААН у справах уцекачоў Філіпа Грандзі.
«Больш за 150 тысяч украінскіх уцекачоў пераехалі ў суседнія краіны, палова з іх — у Польшчу, а многія — у Вугоршчыну, Малдову, Румынію і іншыя краіны», — напісаў ён у Твітэры 26 лютага.
Латвія адпраўляе 30 грузавікоў дапамогі ўкраінскім вайскоўцам
Латвія адправіць ва Ўкраіну каля 30 грузавых машын з дапамогай для вайскоўцаў: індывідуальны рыштунак, каскі, сухія пайкі, мэдычныя прылады і лекі. Пра гэта паведамляе выданьне Delfi з спасылкай на Міністэрства абароны Латвіі.
Расейскія вайскоўцы зьнішчылі дамбу на Паўночна-Крымскім канале
Расейскія вайскоўцы зьнішчылі пабудаваную Ўкраінай на Паўночна-Крымскім канале дамбу, якая перакрывала доступ вады ў Крым, — паведаміла РБК са спасылкай на кіраўніка акупаванага Расеяй Крыму Сяргея Аксёнава.
На сайце ТАСС зьявілася інфармацыя пра 3500 забітых, параненых і палонных расейскіх вайскоўцаў ва Ўкраіне
На сайце расейскага дзяржаўнага агенцтва навінаў ТАСС у навіне пра заяву прэс-сакратара Пуціна зьявілася інфармацыя пра страты расейскага войска ва Ўкраіне са спасылкай на крыніцу ў Міністэрстве абароны Расеі.
У прыватнасьці, там гаварылася пра больш чым 3500 забітых, параненых і палонных вайскоўцаў.
Неўзабаве гэтыя лічбы зьнікла, аднак Радыё Свабода пасьпела зрабіць скрыншот. Цяпер жа шэраг расейскіх урадавых сайтаў недаступны, у тым ліку сайты Крамля і Дзяржаўнай думы.
Расейскія ўлады не паведамляюць аб стратах свайго войска ў вайне супраць Украіны, рапартуючы толькі пра колькасьць захопленых і зьнішчаных украінскіх вайсковых аб’ектаў і адзінак тэхнікі.
«Ужо няма права лічыць сябе закладнікамі абставін». Ціханоўская заклікала пратэставаць супраць вайны каля выбарчых участкаў
Сьвятлана Ціханоўская ў відэазвароце заклікала 27 лютага а 14-й гадзіне прыходзіць да выбарчых участкаў у Беларусі і актыўна выказваць пратэст супраць нападу Расеі на Ўкраіну.
Кадыраў: чачэнскія сілавікі накіраваныя ва Ўкраіну
Кіраўнік Чачні Рамзан Кадыраў заявіў 26 лютага, што чачэнскія сілавікі накіраваныя на тэрыторыю Ўкраіны, паведаміла агенцтва Reuters. Кадыраў заклікаў украінцаў зрынуць свой урад. Раней з такім зваротам да ўкраінскіх вайскоўцаў зьвяртаўся прэзыдэнт Расеі Ўладзімір Пуцін.
У расейскім Белгарадзе затрымалі журналістаў Свабоды і «Новой газеты»
У расейскім Белгарадзе затрымалі журналіста расейскай службы Радыё Свабода Сяргея Хазава-Касія. Разам зь ім затрыманы апэратар Андрэй Кісялёў і журналісты «Новой газеты» Ільля Азар і Іван Жылін. Як паведамляе тэлеканал «Настоящее время», іх завезьлі ў паліцыю. Паводле Хазава, затрыманне адбылося, калі журналісты бралі інтэрвію ў мясцовага жыхара, які выйшаў на вуліцу ў камізэльцы з надпісам «Не вайне».
Дарадца кіраўніка офісу Зяленскага: Беларусь зьяўляецца бокам канфлікту
Дарадца кіраўніка офісу Зяленскага Міхаіл Падаляк пацьвердзіў, што Менск не задавальняе Ўкраіну як месца перамоваў з расейскім бокам.
«Для нас Менск першапачаткова быў дастаткова дзіўным месцам, бо Беларусь зьяўляецца бокам канфлікту. Але калі б былі нармальныя перамоўныя пазыцыі, мы маглі б часова прыняць прапанову месца, бо галоўнае — парадак дня», — цытуе Падаляка РБК.
Падаляк падкрэсьліў, што пакуль ідзецца толькі пра «перамовы аб перамовах» — узгадненьне даты і месца іх правядзеньня.
«Забяру грошы, калі пераможам». Што беларусы думаюць пра блякаваньне іх рахункаў украінскімі банкамі
На працягу дня 25 лютага большасьць буйных украінскіх банкаў заблякавала рахункі, адкрытыя на беларускія і расейскія пашпарты. Як стала вядома Свабодзе, у асобных выпадках рахункі беларусаў ва ўкраінскіх банках не толькі блякавалі, але і абнулялі — зь іх зьнікала інфармацыя аб наяўных сродках.
Што вядома на гэты момант.
Памежная служба Ўкраіны паведаміла аб абстрэлах з боку Беларусі: «Ляціць і малое, і вялікае»
Дзяржаўная памежная служба Украіны паведаміла актуальную інфармацыю наконт расейскага ўварваньня ва Украіну. Ведамства паведамляе аб абстрэлах з боку Беларусі.
«Ляціць і малое, і вялікае. Сёньня на мяжу Ўкраіны ў раёне непадалёк ад вёскі Познань, што на Ровеншчыне, зь Беларусі прыляцеў, хутчэй за ўсё, мінамётны снарад. Боепрыпас узарваўся на маршруце руху нараду Дзяржаўнай памежнай службы. Менавіта на гэтым участку мяжы памежнікі ўжо некалькі разоў заўважалі сьляды запуску ракет з тэрыторыі краіны, якая афіцыйна адмаўляецца ад саўдзелу ў расейскай агрэсіі супраць Украіны», сьцьвярджае ведамства.
У Кіеве аб’явілі камэнданцкую гадзіну
Яна будзе дзейнічаць з 17:00 суботы да 8:00 панядзелка.
У гэты час рух уласнага транспарту, з выняткам тых, хто мае спэцыяльныя пропускі, забаронены. Усе цывільныя, якія будуць на вуліцы падчас камэнданцкае гадзіны, будуць лічыцца ўдзельнікамі дывэрсійна-выведных групаў праціўніка.
На пашкоджаным мосьце загінула дзіця
Міністэрства ўнутраных справаў Украіны паведаміла, што 26 лютага ў Кіеўскай вобласьці з разбуранага мосту на аўтадарозе Кіеў – Ковель – Ягадзін на мяжы Кіеўскай і Жытомірскай абласьцей упалі пяць аўтамабіляў. У ведамстве дадалі, што адно дзіця загінула і чатыры чалавекі атрымалі раненьні.