Ён пачаў з напаміну аб прыняцьці санкцый ЗША і Эўразьвязу 23 лютага.
Зяленскі таксама паведаміў, што размаўляў з прэм’ер-міністрам Нідэрляндаў Маркам Рутэ, які запэўніў яго, што краіна таксама рыхтуе санкцыі ў сувязі з рашэньнем Расеі прызнаць групоўкі на Данбасе.
«Я сустракаўся з прадстаўнікамі буйнога ўкраінскага бізнэсу. Мы дамовіліся, яны ўсе ва Ўкраіне, дзякуй. Разам са сваімі камандамі яны працуюць на абарону Ўкраіны», — дадаў Прэзідэнт.
Перайшоўшы на расейскую мову, ён паведаміў «грамадзянам РФ», што ініцыяваў тэлефонную размову з Уладзімірам Пуціным 23 лютага, але адказу не атрымаў.
Зяленскі адзначыў, што Ўкраіна і Расея маюць больш за 2000 кілямэтраў агульнай мяжы.
«Уздоўж яе цяпер стаяць вашыя войскі — амаль 200 тысяч салдат, тысячы баявых машын. Ваша кіраўніцтва ўхваліла іх крок наперад у іншую краіну. Гэты крок можа стаць пачаткам вялікай вайны на эўрапейскім кантынэнце», — папярэдзіў ён.
Прэзыдэнт Украіны ўказаў на тэзіс расейскай прапаганды пра нібыта «нацызм» украінскага ўрада, адзначыўшы, што ў барацьбе з нацызмам падчас Другой сусьветнай вайны загінулі больш за 8 мільёнаў украінцаў.
Зяленскі паўтарыў, што Ўкраіна хоча міру, але і трымацца прынцыпаў, у тым ліку права на самавызначэньне.
«Мы дакладна ведаем, што нам не патрэбна вайна, ні халодная, ні гарачая, ні гібрыдная. Але калі на нас нападуць войскі, калі яны паспрабуюць забраць нашу краіну, нашу свабоду, наша жыцьцё, жыцьцё нашых дзяцей, мы будзем абараняцца. Не нападаць — абараняцца. Наступаючы, вы ўбачыце нашы твары», — папярэдзіў Зяленскі.
Ён адмаўляў, што Ўкраіна можа прадстаўляць пагрозу для Расеі, і паўтарыў, што Кіеў цяпер не ўваходзіць ні ў адзін абаронны альянс.
«Бясьпека Ўкраіны зьвязаная зь бясьпекай нашых суседзяў, таму сёньня варта казаць пра бясьпеку ўсёй Эўропы. Але наша галоўная мэта — мір ва Ўкраіне і бясьпека нашых украінскіх грамадзян. Для гэтага мы гатовыя размаўляць пра гэта з усімі, у тым ліку з вамі, у любым фармаце, на любой плятформе», — сказаў Зяленскі.
Ён выказаў здагадку, што супрацьстаяць вайне ў Расеі могуць «грамадзкія дзеячы, журналісты, музыкі, акторы, спартсмэны, навукоўцы, мэдыкі, блогеры, стэндапэры, цік-токеры і многія іншыя, простыя людзі, мужчыны, жанчыны, дзеці, пажылыя людзі, бацькі і галоўнае — маці».
«Я ведаю, што мой зварот не пакажуць па расейскім тэлебачаньні, але грамадзяне Расеі павінны яго ўбачыць, яны павінны ведаць праўду. Праўда ў тым, што спыняцца позна. І калі расейскае кіраўніцтва ня хоча сядзець з намі за сталом дзеля міру, яно можа сесьці за стол з вамі. Ці хочуць рускія вайны? Я б вельмі хацеў адказаць на гэтае пытаньне, але адказ залежыць толькі ад вас», — рэзюмаваў прэзыдэнт Украіны.
Паводле апытаньня, праведзенага амэрыканскім каналам CNN, каля паловы расейцаў лічаць правільным выкарыстаньне Расеяй ваеннай сілы, каб не дапусьціць далучэньня Ўкраіны да NATO. Чвэрць рэспандэнтаў заявілі, што лічаць такія дзеяньні няправільнымі, а яшчэ 25% не змаглі адказаць на гэтае пытаньне. Пры гэтым 43% апытаных выказаліся супраць прымяненьня ваеннай сілы для далучэньня Ўкраіны да Расеі, 36% — «за».
- Прэзыдэнт Расеі Ўладзімір Пуцін 21 лютага падчас тэлезвароту да расейцаў назваў так званыя «ДНР» і «ЛНР» незалежнымі дзяржавамі. 22 лютага Савет Фэдэрацыі ратыфікаваў гэтае рашэньне. Расейскія вайсковыя падразьдзяленьні накіруюць у сэпаратысцкія «рэспублікі».
- Расея прызнала «ДНР» і «ЛНР» у тых межах, якія вызначаны ў іх канстытуцыях, паведаміла агенцтва ТАСС са спасылкай на расейскага прэзыдэнта Ўладзіміра Пуціна. Ваеўнікі «ДНР» і «ЛНР» прэтэндуюць на тэрыторыі Данецкай і Луганскай абласьцей Украіны цалкам, хоць кантралююць менш за палову гэтай тэрыторыі.
- ЗША, Эўразьвяз, Вялікая Брытанія, Канада, Японія, Аўстралія і інш. абвясьцілі новыя санкцыі супраць расейскіх уладаў. Нямеччына спыніла сэртыфікацыю расейска-нямецкага газаправоду «Паўночны паток – 2».
- Ва Ўкраіне ўводзяць надзвычайнае становішча, абвясьцілі прызыў рэзэрвістаў. Кіеў рэкамэндаваў сваім грамадзянам тэрмінова пакінуць Расею
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
