Ефаркін узначальвае саратаўскую ўправу ФСВП з кастрычніка 2021 году. Ранейшы начальнік падаў у адстаўку пасьля паведамленьняў аб катаваньнях асуджаных.
Раней Ефаркін служыў у Краснаярску, дзе зьняволеныя і праваабаронцы рэгулярна паведамлялі аб катаваньнях. Праект Gulagu. net і «Новая газета» публікавалі сьведчаньні аб датычнасьці Ефаркіна да катаваньняў у краснаярскай калёніі. Таксама праваабаронцы сьцьвярджалі, што падчас працы намесьнікам начальніка апэратыўнай управы ФСВП Ефаркін быў датычны да катаваньняў у Саратаўскай сухотнай лякарні № 1.
Пасьля публікацыі праваабаронцамі архіву ФСВП з запісамі актаў гвалтаваньня і зьбіцьця зьняволеных Сьледчы камітэт завёў некалькі крымінальных спраў па фактах перавышэньня службовых паўнамоцтваў. Начальнік саратаўскага УФСВП Аляксей Фядотаў падаў у адстаўку, а 18 супрацоўнікаў ведамства звольнілі. У лістападзе прэзыдэнт Расеі звольніў дырэктара ФСВП Аляксандра Калашнікава.
У Дзярждуму ўнесьлі законапраект аб узмацненьні жорсткасьці пакараньня за катаваньні. Дакумэнт ужо прыняты ў першым чытаньні. Цяпер за катаваньні, арганізаваныя прадстаўнікамі ўлады з мэтай прымусіць да дачы паказаньняў ці запалохаць, будзе пагражаць пазбаўленьне волі на тэрмін да 12 гадоў.
Заснавальнік праекту Gulagu. net Уладзімір Асечкін лічыць, што гэты законапраект не дапаможа спыніць катаваньні ў Расеі. Тым ня менш, на думку праваабаронцы, ён карысны для грамадзтва, бо «пераводзіць катаваньні ў катэгорыю асабліва цяжкіх злачынстваў» і дазволіць праваабаронцам прыцягваць да крымінальнай адказнасьці ўсіх нядобрасумленных супрацоўнікаў ФСВП, МУС і ФСБ, якія хавалі катаваньні.
- Праваабарончы праект Gulagu. net 6 кастрычніка апублікаваў запісы катаваньняў, зьдзекаў і згвалтаваньняў зьняволеных у сухотным шпіталі Фэдэральнай службы выкананьня пакараньняў (ФСВП) у Саратаўскай вобласьці. Пазьней СМІ паведамілі, што начальнік упраўленьня ФСВП па Саратаўскай вобласьці, палкоўнік унутранай службы Аляксей Фядотаў падаў прашэньне аб адстаўцы. ФСВП пацьвердзіла гэтую інфармацыю, а таксама паведаміла аб звальненьні начальніка саратаўскай турэмнай лякарні Паўла Гаценкі і яшчэ некалькіх чалавек. Заведзена некалькі крымінальных спраў.
- Gulagu. net 4 кастрычніка паведаміў, што атрымаў 40 гігабайтаў відэазапісаў катаваньняў і згвалтаваньняў вязьняў у расейскіх турмах. Архіў быў атрыманы дзякуючы былому вязьню саратаўскай турмы, беларускаму грамадзяніну Сяргею Савельеву, які таксама зазнаў жорсткае абыходжаньне. Яго вымусілі супрацоўнічаць з турэмнай службай, ён кіраваў кампутарнай сеткай турмы і забясьпечваў доступ да відэафайлаў з усёй расейскай пэнітэнцыярнай сыстэмы. Пры вызваленьні ён змог вынесьці флэшку з запісамі катаваньняў. Цяпер ён у Францыі, дзе сустракаецца з журналістамі, працуе з адвакатам і накіроўвае звароты ў праваахоўныя органы Эўропы.
