Актыўныя практычныя дзеяньні ў рамках вучэньняў «Саюзная рашучасьць – 2022» на тэрыторыі Беларусі 14 лютага праводзяцца на трох палігонах і сама меней васьмі ўчастках мясцовасьці, паведаміла агенцтва BPN са спасылкай на прэс-службу Міністэрства абароны.
- На Гожаскім палігоне (Горадзенская вобласьць) адпрацоўваюцца задачы ў вядзеньні абарончага бою.
- У Берасьцейскай вобласьці на ўчастку мясцовасьці ў Баранавіцкім раёне мэханізаваныя падразьдзяленьні Ўзброеных сіл Беларусі і падразьдзяленьні марской пяхоты Узброеных сіл Расеі «вядуць вучэбныя баявыя дзеяньні на межах манэўранай абароны».
- Штурмавая авіяцыя Паветрана-касьмічных сіл УС РФ «адпрацоўвае пытаньні авіяцыйнай падтрымкі абарончых войскаў з ужываньнем авіяцыйных сродкаў паражэньня» на Ружанскім авіяпалігоне.
- На Берасьцейскім палігоне мотастралковыя падразьдзяленьні Расеі практыкуюцца ў зьнішчэньні незаконнага ўзброенага фармаваньня. Падразьдзяленьні сіл спэцыяльных апэрацый Беларусі разам з расейскімі мотастралкамі «нясуць службу на ахоўных аб’ектах з мэтай недапушчэньня выхаду незаконных узброеных фармаваньняў».
- На ўчастку мясцовасьці ў Лунінецкім раёне расейскія зэнітныя ракетныя падразьдзяленьні адпрацоўваюць супрацьпаветранае прыкрыцьцё войскаў, а таксама нясуць баявое дзяжурства па супрацьпаветранай абароне.
- У Гомельскай вобласьці на ўчастку мясцовасьці ў раёне абласнога цэнтру падразьдзяленьні беларускіх сіл спэцапэрацый і расейскія дэсантнікі займаюцца пошукам, блякаваньнем і зьнішчэньнем дывэрсійна-выведных груп умоўнага праціўніка.
- Акрамя таго, падразьдзяленьні Паветрана-дэсантных войскаў Расеі «робяць узмацненьне ўчасткаў дзяржаўнай мяжы».
- На ўчастках мясцовасьці ў Пухавіцкім, Асіповіцкім, Пінскім, Мазырскім і Рэчыцкім раёнах войскі працягваюць выконваць «навучальна-баявыя задачы ў рамках сумеснага апэратыўнага вучэньня».
- Акрамя таго, Дэпартамэнт інфармацыі Мінабароны Расеі напісаў, што экіпажы зьнішчальнікаў Су-30см Расеі і Беларусі адпрацавалі задачы сумеснага патруляваньня дзяржаўнай мяжы так званай «саюзнай дзяржавы». Палёты самалётаў са складу дзяжурных сіл ажыцьцяўляліся як адзіночна, так і парамі ў складаных мэтэаралягічных умовах.
У ходзе палётаў войскі адпрацавалі ўзаемадзеяньне экіпажаў самалётаў пры выкананьні задач баявога дзяжурства.
