Камэнтары прадстаўнікоў краін-удзельніц ЭЗ, якія асьцерагаюцца нэгатыўнай рэакцыі ў сябе на радзіме дзеля праблемаў міграцыі, былі, аднак, больш стрыманыя. Пасьля некалькіх тыдняў абмеркаваньня лідэры Эўразьвязу павінны ўзгадніць дэклярацыю саміту, якая пацьвердзіць дадзенае 18 гадоў таму абяцаньне наконт будучага ўступленьня ў блёк Сэрбіі, Чарнагорыі, Босьніі і Герцагавіны, Паўночнай Македоніі, Косава і Альбаніі, калі гэтыя краіны будуць адпавядаць крытэрам Эўразьвязу. Аднак, паколькі «працэс пашырэньня» заблякаваны шэрагам нявырашаных спрэчак як у Брусэлі, так і ў рэгіёне, многія на Балканах лічаць, што заява ЭЗ нічым не падмацаваная.
Старшыня Эўракамісіі зрабіла спробу запэўніць шэсьць заходнебалканскіх дзяржаваў у адваротным.
«Заходнія Балканы належаць Эўразьвязу. Мы хочам, каб яны былі ў Эўразьвязе. Мы — адна эўрапейская сям’я», — сказала фон дэр Ляен, выступаючы перад журналістамі па прыбыцьці на саміт у сталіцы Славеніі.
«У нас агульная гісторыя. Мы падзяляем тыя самыя каштоўнасьці, і я глыбока перакананая, што ў нас той самы лёс», — падкрэсьліла кіраўніца Эўракамісіі.
