Ліст ад зьняволенага калегі атрымаў старшыня Беларускай сацыял-дэмакратычнай партыі (Грамада) Ігар Барысаў. Зь яго вынікае, што ня ўсе допісы даходзяць у два бакі, а толькі ў фармаце «мазайкі», з чаго цэласнасьць падзеяў ды інфармацыі губляецца.
«Піша, што па-ранейшаму сядзіць у камэры, ніякіх сьледчых дзеяньняў зь ім ніхто не праводзіць. Хадайнічаў аб зьмене рэжыму ўтрыманьня, але ўсё бясплённа, нічога не атрымалася. Мае тэлевізар, таму збольшага ведае, што адбываецца цяпер у Беларусі», — пераказвае ліст Ігар Барысаў.
Сярод іншага Рыгор Кастусёў наракае на букет хваробаў, якія не даюць яму спакою. Трывогу выклікае падазрэньне на анкалёгію, моцна баляць ныркі. А ў дадатак яшчэ падхапіў каранавірус (хоць з улікам, як доўга ідуць лісты, нешта можа зьмяніцца).
«Пастскрыптумам просіць даслаць вытрымкі з публікацый „СБ. Беларусь сегодня“. Ёсьць там такі дзіўны аўтар, які чамусьці любіць пра яго пісаць — у сярэднім раз-два на месяц абавязкова згадвае ягонае прозьвішча. Таксама актыўна цікавіцца, што адбываецца на палітычным полі Беларусі. Ну і перадае ўсім паплечнікам вялікае прывітаньне», — падсумоўвае Ігар Барысаў.
За кратамі ў СІЗА Камітэту дзяржбясьпекі Рыгор Кастусёў ужо хутка як паўгода.
Падтрымаць палітвязьня можна лістом ці паштоўкай: 220050, Менск, Галоўпаштамт, а,с 8. Кастусёву Рыгору Андрэевічу.
Затрыманьне Зянковіча, Кастусёва, Фядуты і справа «змоўшчыкаў». Што трэба ведаць
- У Шклове ўвечары 12 красавіка затрымалі кіраўніка Партыі БНФ Рыгора Кастусёва. Тады было вядома толькі, што ён праходзіць у крымінальнай справе і знаходзіцца ў СІЗА КДБ.
- Увечары таго ж дня жонка беларускага паліттэхноляга Аляксандра Фядуты паведаміла пра яго зьнікненьне ў Маскве. 13 красавіка КДБ Беларусі паведаміў, што Фядуту затрымалі.
- У ноч на 14 красавіка стала вядома аб затрыманьні ў Маскве беларускага адваката з ЗША Юрася Зянковіча. Усе яны цяпер у менскім СІЗА КДБ.
- Увечары 17 красавіка дзяржаўныя СМІ Беларусі паказалі заяву Аляксандра Лукашэнкі, што заходнія спэцслужбы рыхтавалі збройны мяцеж, а таксама замах на яго і на ягоных дзяцей.
- Лукашэнка абвінаваціў у датычнасьці да падрыхтоўкі замаху затрыманых Зянковіча, Кастусёва і Фядуту.
- Амаль сынхронна ФСБ Расеі заявіла, што яны сумесна з КДБ Беларусі спынілі меркаваную змову з удзелам Зянковіча і Фядуты, якія нібыта плянавалі 9 траўня «ажыцьцяўленьне вайсковага перавароту ў Беларусі па адпрацаваным сцэнары „каляровых рэвалюцый“ з прыцягненьнем мясцовых і ўкраінскіх нацыяналістаў, а таксама фізычную ліквідацыю Аляксандра Лукашэнкі».
- У рэпартажы на беларускім дзяржаўным тэлеканале АНТ паказалі фрагмэнт відэаразмовы ў Zoom, у якой, акрамя Зянковіча, Кастусёва і Фядуты, удзельнічалі яшчэ чатыры чалавекі (усе жывуць у ЗША), нібыта ўдзельнікі змовы. У інтэрвію Свабодзе двое зь іх адкінулі абвінавачаньні (тут і тут).
- Афіцыйныя прадстаўнікі ЗША і Польшчы назвалі абвінавачаньні ўладаў Беларусі і Расеі на свой бок няпраўдай.
- 21 красавіка Ўладзімір Пуцін заявіў, што краіны Захаду ігнаруюць факты падрыхтоўкі «дзяржаўнага перавароту ў Беларусі» і «плянаваньня забойства» Аляксандра Лукашэнкі. Ён абвінаваціў удзельнікаў «змовы супраць Лукашэнкі» ў падрыхтоўцы масаванай кібэратакі на Беларусь.
- 22 красавіка стала вядома, што старшыня Партыі БНФ Рыгор Кастусёў, палітоляг Аляксандар Фядута і юрыст Юры Зянковіч абвінавачаныя ў змове з мэтай захопу дзяржаўнай улады неканстытуцыйным шляхам (ч. 1 арт. 357 Крымінальнага кодэксу).
- 30 красавіка КДБ назваў імёны дзевяці абвінавачаных. Гэта Аляксандар Фядута, Юры Зянковіч, Рыгор Кастусёў, Вольга Галубовіч, Дзьмітры Шчыгельскі, Аляксандар Перапечка, Павал Кулажанка, Віталь Макаранка, Ігар Макар. Акрамя Фядуты, Зянковіча і Кастусёва, у няволі трымаюць Вольгу Галубовіч.
- Прысуды ў справе: Юрасю Зянковічу — 11 гадоў калёніі, Аляксандру Фядуту — 10 гадоў, Рыгору Кастусёву — 10 гадоў, Дзянісу Краўчуку — 2,5 года.
