Белгародзкі абласны суд прыняў рашэньне аб экстрадыцыі Вадзіма Дубойскага, паведаміла Свабодзе ягоная сястра. Паводле яе, адвакат будзе рыхтаваць апэляцыю на гэтае рашэньне, а расейскія праваабаронцы будуць пісаць пра справу Вадзіма ў Эўрапейскі суд у правах чалавека.
У Беларусі Вадзіму Дубоўскаму пагражае ад 3 да 8 гадоў пазбаўленьня волі.
Да суду гітарыст хардкор-панк-гурту Vagitta Вадзім Дубойскі сядзеў у СІЗА-3 у Белгарадзе. Пасьля пабіцьця ў жніўні 2020 году ў Берасьці мужчыну праз суткі без дакумэнтаў выпусьцілі на волю, ён трапіў у лякарню.
Вадзім тады зьняў пабоі, а сілавікі завялі на яго крымінальную справу за «масавыя беспарадкі». У верасьні яго затрымалі па дарозе да лекара, а ў кастрычніку ён уцёк у Расею, дзе яго ўзялі пад варту мясцовыя сілавікі, падаў прашэньне аб наданьні статусу ўцекача і часовага прытулку. Першапачаткова берасьцеец плянаваў уцячы ва Ўкраіну, але яго затрымалі расейскія памежнікі за спробу пераходу мяжы па-за пунктам пропуску.
Беларускія ўлады накіравалі запыт на экстрадыцыю Дубойскага. У адным зь лістоў на волю Вадзім напісаў, што на радзіме ў выпадку высылкі яго могуць чакаць катаваньні і калецтва ад іх.
Дубойскі — адзін са шматлікіх беларусаў, якіх затрымалі расейскія ўлады за ўдзел у беларускіх пратэстах. Фактычна толькі адзін з затрыманых пасьля жніўня 2020 году чалавек быў вызвалены. Гэта блогер Мікалай Давідчык, які амаль 20 гадоў пражыў у Маскве. У Беларусі Давідчыка абвінавацілі ў грубым парушэньні грамадзкага парадку за адміністраваньне тэлеграм-чату роднай Ліды і накіравалі запыт аб яго экстрадыцыі. У сакавіку Мікалая затрымалі супрацоўнікі ФСБ. Ён правёў паўтара месяца ў СІЗА, пакуль расейская Генпракуратура нечакана не адхіліла запыт. Пасьля вызваленьня ён зьехаў у Польшчу.
