НАК Беларусі ў афіцыйнай заяве ў адказ зьвяртае ўвагу, што гэта часовыя захады і разбор бягучай сытуацыі працягваецца.
«Нацыянальны алімпійскі камітэт Рэспублікі Беларусі пацьвярджае гэтую інфармацыю, і ў бліжэйшы час трэнэры вернуцца ў Менск. Разам з тым яны пакідаюць за сабой права абскардзіць гэтае рашэньне.
У сваю чаргу, мы па-ранейшаму адкрытыя для працягу дыялёгу і знаходзімся ў шчыльнай супрацы з МАК для высьвятленьня ўсіх абставінаў прынятага рашэньня.
НОК Беларусі ў поўнай меры адстойвае і будзе далей абараняць інтарэсы ўсіх беларускіх атлетаў і трэнэраў ад любых формаў дыскрымінацыі пры наяўнасьці такіх».
Міжнародны алімпійскі камітэт скасаваў акрэдытацыю двух беларускіх трэнэраў, якіх падазраюць у спробе прымусіць спрынтэрку Крысьціну Ціманоўскую вярнуцца ў Беларусь з Алімпіяды ў Токіё.
МАК прыняў гэтае рашэньне 6 жніўня «ў інтарэсах дабрабыту спартоўцаў Беларусі, якія ўсё яшчэ знаходзяцца ў Токіё», гаворыцца ў паведамленні ў Twitter.
У МАК заявілі, што трэнэрам Артуру Шумаку і Юрыю Маісевічу прапанавалі неадкладна пакінуць Алімпійскую вёску, што яны і зрабілі. Акалічнасьці справы Ціманоўскай і ролю ў ёй Шумака і Маісевіча будзе высьвятляць адмыслова створаная камісія, паведамілі ў МАК.
Крысьціна Ціманоўская і яе адмова вяртацца ў Беларусь
- 1 жніўня 2021 году падчас Алімпіяды 24-гадовая лёгкаатлетка Крысьціна Ціманоўская заявіла, што яе спрабавалі сілай вывезьці з Токіё ў Беларусь. Яна адмовілася ад пасадкі на самалёт і заявіла, што ў аэрапорт яе даставілі супраць волі.
- Ціманоўскую выключылі з алімпійскай каманды пасьля таго, як яна выступіла з крытыкай трэнэрскага складу ў сваім Instagram. Яе паставілі бегчы эстафэту 4×400 мэтраў, хоць на Алімпіядзе Крысьціна рыхтавалася выступіць у бегу на 100 і 200 мэтраў.
- Гэта здарылася пасьля таго, як Марыю Жодзік, Ганну Міхайлаву і Крысьціну Мулярчык не дапусьцілі да эстафэты з прычыны недастатковай колькасьці допінг-пробаў. Жодзік абвінаваціла ў гэтым Беларускую фэдэрацыю лёгкай атлетыкі. Ціманоўская, у сваю чаргу, заявіла, што ніколі ня бегала дыстанцыю, на якую яе без папярэджаньня выстаўляе трэнэрскі штаб.
- Неўзабаве пачаліся пагрозы ад адміністрацыі каманды і галоўнага трэнэра зборнай у лёгкай атлетыцы Юрыя Маісевіча. Функцыянэры спачатку ігнаравалі пытаньні Ціманоўскай наконт удзелу ў няпрофільнай для яе эстафэце, куды атлетку ўключылі безь яе згоды, а затым пачалі пагражаць, заяўляючы, што рашэньне пра яе «выдаленьне з Алімпіяды» прынятае «на самым версе». Крысьціна апублікавала, а потым выдаліла аўдыязапіс з пагрозамі.
- Ціманоўская заявіла, што ў Беларусь ня вернецца, бо баіцца перасьледу. 2 жніўня яна прыйшла ў польскую амбасаду, дзе ёй выдалі гуманітарную візу. У той жа дзень стала вядома, што яе муж Арсень Зданевіч зьехаў зь Беларусі ва Ўкраіну.
- Трэцяга жніўня Ціманоўская з Токіё паразмаўляла з прэм’ер-міністрам Польшчы Матэвушам Маравецкім.
- 4 жніўня быў заплянаваны пералёт спартоўкі ў Варшаву, у апошні момант зь меркаваньняў бясьпекі Варшаву зьмянілі на Вену. У аэрапорце Токіё перад вылетам у Аўстрыю Ціманоўская зьявілася ў суправаджэньні афіцэраў японскай паліцыі.
- 5 жніўня Ціманоўская прыбыла ў Варшаву і дала прэсавую канфэрэнцыю.
- 6 жніўня Міжнародны алімпійскі камітэт паведаміў, што «ў інтарэсах дабрабыту спартоўцаў Беларусі» скасаваў акрэдытацыю двух трэнэраў Ціманоўскай, Артура Шумака і Юрыя Маісевіча, і пачаў расьсьледаваньне інцыдэнту.
- 10 жніўня Крысьціна Ціманоўская падпісала кантракт са спартовай групай Orlen. У польскай камандзе адзначылі, што спадзяюцца на хуткае аднаўленьне кар’еры беларускі.
