Выступ каманды Беларусі чальцы выканкаму фэдэрацыі прызналі нездавальняючым.
Як нагадвае сайт хакейнай арганізацыі, пад кіраўніцтвам 59-гадовага Міхаіла Захарава каманда заняла перадапошняе 15-е месца, апярэдзіўшы толькі італьянцаў. Беларусы атрымалі адну перамогу ў сямі матчах, абыграўшы Швэцыю (1:0), акрамя таго, здолелі адабраць адно ачко ў Чэхіі, саступіўшы ў авэртайме 2:3.
Прапіску ў эліце зборная захавала дзякуючы таму, што праз пандэмію не праводзіліся чэмпіянаты сьвету ў ніжэйшых дывізыёнах.
Міхаіл Захарава прызначылі галоўным трэнэрам 20 жніўня 2019 году, на гэтай пасадзе ён зьмяніў Андрэя Сідарэнку.
Пад яго кіраўніцтвам зборная правяла 8 матчаў: 5 перамог і 3 паразы. Беларусы выйгралі Кубак чатырох нацый у Ліепаі і Кубак шасьці нацый у Будапэшце.
Новым трэнэрам, які ўзначаліць зборную Беларусі на пэрыяд падрыхтоўкі і на кваліфікацыю да Алімпійскіх гульняў 2022 году, прызначылі Крэга Вудкрафта, які адначасова ўзначальвае трэнэрскі штаб менскага «Дынама».
Першапачаткова чэмпіянат сьвету – 2021 разам з Рыгай мусіў прыняць і Менск, але праз рэпрэсіі і гвалт першынство ў Беларусі забралі.
