Прадстаўнік Украіны ў Трохбаковай кантактнай групе, журналіст Сяргей Гармаш заявіў пра немагчымасьць далейшага выкарыстаньня Менску як нэўтральнай перамоўнай пляцоўкі па ўрэгуляваньні сытуацыі на ўсходзе Ўкраіны ў выпадку, калі беларускія ўлады дадуць дазвол прадстаўнікам так званай «ЛНР» на правядзеньне сьледчых дзеяньняў з Раманам Пратасевічам.
«Заяву Лукашэнкі, што ён прапанаваў Пуціну, каб «сьледчыя» з асобных раёнаў Луганскай вобласьці прыехалі ў Беларусь і дапыталі выкрадзенага КДБ-ФСБ галоўнага рэдактара Nexta Рамана Пратасевіча, можна разглядаць як дэ-факта прызнаньне рэжымам Лукашэнкі марыянэткавых «рэспублік», — заявіў Сяргей Гармаш.
Украінскі ўдзельнік перамоваў перакананы, што гэтая прапанова Лукашэнкі — прадуманы і дэманстратыўны крок.
«Паказальна, што запрашэньне марыянэткавым „сьледчым“ „рэспублік“ ён адправіў праз сапраўдны другі бок канфлікту — прэзыдэнта Расеі. Вядома, пасьля гэтага ў Масквы ня можа быць аргумэнтаў супраць пераносу перамоўнага працэсу зь Беларусі ў іншую краіну. Пасьля гэтага Менск ужо адкрыта перастаў быць нэўтральным», — патлумачыў Сяргей Гармаш.
Удзельнік менскіх перамоваў таксама лічыць недапушчальнай супрацу Службы бясьпекі Ўкраіны, якая, паводле яго, «дапытвае супрацоўнікаў украінскай выведкі паводле запытаў КДБ Беларусі, прычым у справах, заведзеных супраць беларускай апазыцыі».
«Дзеяньні рэжыму Лукашэнкі зрабілі Беларусь адкрыта варожай да Ўкраіны. Практычна, Менск стаў пагрозай нашай краіне. У такіх умовах мы павінны актывізаваць падтрымку беларускай апазыцыі, а не дапамагаць ФСБ Расеі зь ёю змагацца», — падкрэсьліў Гармаш.
Раней пракуратура так званай «ЛНР» заявіла, што завяла крымінальную справу супраць Рамана Пратасевіча паводле ягонай нібыта «датычнасьці да абстрэлаў мірнага насельніцтва Данбасу» і зьвярнулася да Беларусі з просьбай перадаць яго для правядзеньня сьледчых дзеяньняў. 2 чэрвеня РИА Новости са спасылкай на тэлеканал «Беларусь-1» паведаміла, што Лукашэнка не пярэчыць каб прадстаўнікі «ЛНР» прыехалі ў Менск і «задалі пытаньні» затрыманаму журналісту.
У траўні стала вядома, што Камітэт дзяржаўнай бясьпекі Беларусі ў межах двухбаковага пагадненьня аб міжнароднай прававой дапамозе зьвярнуўся ў праваахоўныя органы Ўкраіны па правядзеньне допытаў зь некалькімі фігурантамі справы Мікалая Аўтуховіча.
У прыватнасьці, КДБ папрасіў дапытаць беларускага добраахвотніка Дзьмітрыя Палойку, заснавальніцу дабрачыннага фонду «Беларускі Майдан» Алену Васільеву, якая летась у верасьні ўцякла ва Ўкраіну пад пагрозай перасьледу, экс-камандзіра добраахвотніцкага батальёну «Данбас» Сямёна Сяменчанку, а таксама шэраг іншых грамадзян Украіны, якім належалі пэўныя нумары тэлефонаў. Пазьней высьветлілася, што гэтыя нумары належаць супрацоўнікам украінскай выведкі.
