За апошнія 80 год папуляцыя рабых сусьлікаў на тэрыторыі Беларусі скарацілася больш як на 90%. Нясьвіскі заоляг Сяргей Шакала расказаў «Нашай Ніве», што ў 2019-м знайшлі 12 калёній сусьлікаў. Цяпер іх усяго 5 — у Капыльскім і Нясьвіскім раёнах. Ахоўны статус мае толькі адна — у вёсцы Юшавічы.
Па словах Сяргея Шакала, палі, на якіх жывуць сусьлікі, пры неабходнасьці можна браць у сельскагаспадарчы абарот, але ў адпаведнасьці са спэцыяльнай тэхналёгіяй.
«За савецкім часам з грызуном змагаліся як са шкоднікам, труцілі хіміяй. У Заходняй Беларусі ставіліся больш ашчадна. А калі ў 1939 годзе гэтыя землі далучылі, там таксама пачалося актыўнае асваеньне палёў і зьнішчэньне сусьліка катастрафічнымі тэмпамі. Пасьля палі засявалі монакультурамі — рапсам, ячменем, — а зьвяркі ў такіх умовах дрэнна жывуць», — расказаў выданьню Сяргей Шакала.
Паводле Нясьвіскай раённай інспэкцыі прыродных рэсурсаў і аховы навакольнага асяродзьдзя, месцу жыхарства зьнішчанай калёніі сусьлікаў не надалі ахоўнага статусу, бо не атрымалі пашпарт гэтага месца з Акадэміі навук. Аднак пра само паселішча ведалі.
«Летась мы выяжджалі з навукоўцамі на поле, яны ставілі фотапасткі. Там было 2–3 норкі, але фотапасткі ніводнага здымка сусьліка не зрабілі», — пракамэнтаваў сытуацыю выданьню начальнік інспэкцыі Юры Грынкевіч.
Нават калі тэрыторыя ня мае адмысловага статусу, гэты від жывёл знаходзіцца пад аховай. За зьнішчэньне зьвяркоў прадугледжваецца адказнасьць (згодна з артыкулам 15.8 КаАП за парушэньне патрабаваньняў па ахове дзікіх жывёл юрыдычнай асобе пагражае штраф ад 25 да 400 базавых велічынь).
