13 красавіка ў паліцыі расейскага Бранску ў межах «міжнароднага супрацоўніцтва» апыталі блогера і журналіста Леаніда Кудзінава. Ён жыў у Гомлі з канца 2017 году, але 5 жніўня 2020 году яго дэпартавалі ў Расею за ўдзел у акцыі пратэсту.
«Сёньня ў паліцыі я даведаўся, што ў Беларусі на мяне заведзеная крымінальная справа за паклёп на міліцыянта», — паведаміў блогер Свабодзе.
Ён адмовіўся адказваць на ўсе пытаньні паліцыі, скарыстаўшыся 51-м артыкулам Канстытуцыі РФ ня сьведчыць супраць сябе.
Леанід Кудзінаў піша блогі для расейскіх СМІ і вядзе свой Youtube-канал Voronin news.
Крымінальную справу завялі ў Гомлі паводле артыкула 188 (паклёп). Санкцыя — да трох гадоў зьняволеньня. Пацярпелы ў справе — участковы Цэнтральнага РАУС Гомля Арцём Жаўняк. Удзельнікам гомельскіх пратэстаў ён добра вядомы, бо часта затрымліваў людзей і складаў на іх пратаколы.
Блогер вінаватым сябе ня лічыць і спадзяецца, што Расея яго ня выдасьць
Леанід Кудзінаў на сваім youtube-канале асьвятляў у тым ліку і пратэсты ў Гомлі.
«Сёньня мне выдалі пастанову аб крымінальнай справе за „паклёп“ за мае ролікі на Youtube, а таксама пастанову аб прызнаньні падазраваным. Другі выпадак „цікавы“, паколькі гаворка ідзе пра публікацыі ў Telegram у групе „Гомель: нас 97%“, таксама ў дачыненьні да міліцыянта Жаўняка, але карыстальнікам „Заткнись Дони“, пад нікам якога, на думку міліцыянтаў, хаваўся я. Але гэта ня так. Гэта я і патлумачыў паліцыі. Сярод пытаньняў, якія перада мной ставілі, былі:
- Калі і навошта я прыехаў у Гомель?
- На якія сродкі існаваў?
- Хто і калі завёў канал Voronin news?
- Хто і калі разьмяшчаў ролікі пра Жаўняка?
- Ці ведаю я адміністратараў і іншых удзельнікаў суполкі „Гомель: нас 97%“?
- Які сэнс я ўкладаў у словы, вымаўленыя ў адрас Жаўняка: „кат“, „садыст“, „вар’ят“?», — пракамэнтаваў блогер.
Ён лічыць, што рэжым у Беларусі ваюе з усімі, хто ня згодны мірыцца зь беззаконьнем і несправядлівасьцю:
«У гэтым пляне дзеяньні міліцыі і Сьледчага камітэту, якія распачалі ў дачыненьні да мяне крымінальную справу, цалкам чаканыя. Выкладваючы свае ролікі, я разумеў, што рана ці позна такія справы на мяне будуць заведзеныя, гэта для іх „справа прынцыпу“, хай нават я і знаходжуся ўжо ў Расеі, якая, як і іншыя дзяржавы, не выдае сваіх грамадзян», — дадаў Леанід Кудзінаў.
