У камэнтары парталу Tut.by Генадзь Давыдзька заявіў, што ягоную пошту ўзламалі і цяпер рассылаюць «дурныя лісты».
«Як дэпутат і грамадзянін я не магу спакойна глядзець на тое, што адбываецца ў краіне. Бачу, што жыцьцё ў Беларусі, на мой глыбокі жаль, пагаршаецца. І як бы я ні падтрымліваў Аляксандра Рыгоравіча, вымушаны прызнаць: краіна рухаецца не туды. Таму заклікаю сваіх калег па Палаце прадстаўнікоў датэрмінова вызваліць Аляксандра Лукашэнку ад пасады», — гаворыцца ў лісьце.
Ад ягонага імя ўдакладняецца, што ўжо ініцыявана стварэньне адмысловай камісіі, якая «зробіць заключэньне аб няздольнасьці Лукашэнкі ажыцьцяўляць абавязкі прэзыдэнта», а таксама накіраваны ліст у Сьледчы камітэт.
«Хтосьці ўзламаў пошту і ад майго імя рассылае гэтыя дурныя лісты. Вам, магчыма, гэта падабаецца, таму што палітыка вашага рэсурсу накіравана на зьвяржэньне дзяржаўнай улады. Але я адказваю, як ёсьць на самой справе: натуральна, я такога ліста не рабіў», — сказаў Генадзь Давыдзька ў размове з Tut.by.
У Палаце прадстаўнікоў журналістам таксама сказалі, што згаданы ліст — фэйк і абсурд, ні пра якую камісію пытаньне не ўздымалася.
