Чарговы суд за сьцяг у акне
У Фрунзэнскім раённым судзе Менску прайшло паседжаньне ў справе Сяргея Мураўскага. На яго склалі пратакол паводле арт. 23.34 КаАП за «пікетаваньне з мэтай выказваньня сваіх палітычных поглядаў» за сьцяг на акне кватэры на 16-м паверсе.
Як паведамляе Праваабарончы цэнтар «Вясна», Сяргей на судзе віны не прызнаў, бо лічыць, што 16-ы паверх — «ня самае ўдалае месца для пікетаваньня». Больш за тое, па яго словах, вокны выходзяць на поле, дарогу і цяпліцы. Само палатно бел-ружова-белае і выкарыстоўваецца ў якасьці шторы.
Судзьдзя Юлія Блізьнюк вырашыла, што гэты сьцяг — незарэгістраваная сымболіка, а Сяргей Мураўскі з дапамогай яе пікетаваў. У выніку Сяргею прысудзілі паводле арт. 23.34 КаАП 10 дзён адміністрацыйнага арышту.
Суд у Наваградку пасьля пагоні
Жыхару Наваградку Ўладзімеру Буйко далі 10 дзён арышту за тое, што кіраваў машынай без правоў. Напярэдадні ДАІ ўчыніла за ім пагоню і забрала машыну. З размоваў міліцыянтаў мужчына зразумеў: насамрэч гэта пакараньне за тое, што не сплаціў 675 рублёў штрафу за ўдзел у мітынгу.
Рашэньне выносіў судзьдзя Васіль Аляхновіч. Ён таксама пастанавіў вярнуць машыну ўласьніку.
