На заклік штабу Аляксея Навальнага актывісты ў пэўны час запальваюць на вуліцы ліхтарыкі на мабільных тэлефонах, а таксама выкладваюць зь сьвечак сэрцайкі. Дэвіз акцыі: «Каханьне мацнейшае за страх», паведамляе расейская служба Свабоды.
Акцыі ўжо адбыліся ў Петрапаўлаўску-Камчацкім, на Сахаліне, ва Ўладзівастоку. Пакуль з большасьці апублікаваных у сацсетках фотаздымкаў цяжка зразумець, колькі людзей паўдзельнічалі ў акцыях. Пакуль не паведамлялася пра тое, каб улады перашкаджалі ўдзельнікам акцый.
Урад Прыморскага краю ў сваім інстаграме анансаваў акцыю ў падтрымку Навальнага, не згадаўшы само прозьвішча апазыцыянэра.
Раней у шэрагу гарадоў актывісты атрымалі засьцярогі ад пракуратуры аб недапушчальнасьці «экстрэмісцкай дзейнасьці». Дэпутат расейскай Дзярждумы Пётар Талстой параўнаў плян апазыцыі выйсьці на вуліцы з уключанымі ліхтарыкамі зь «дзеяньнямі нацысцкіх памагатых падчас ІІ Сусьветнай вайны».
Раскамнагляд заблякаваў сайт выданьня «Спектр» за тое, што ў яго артыкуле называўся дакладны час акцыі.
