Некаторым дзецям пагражае турэмнае зьняволеньне, тым часам як іншыя жывуць у страху, што іхныя бацькі трапяць у турму або што іх саміх перададуць пад апеку дзяржавы. Пра гэта Amnesty International расказвае ў сваім інфармацыйным брыфінгу, падрыхтаваным у рамках кампаніі #StandWithBelarus.
«Падчас жорсткага задушэньня іншадумства ўлады абыходзяцца зь дзецьмі цалкам непрымальным чынам. Некаторыя дзеці апынуліся ў адвольным зьняволеньні, і ім выставілі сфабрыкаваныя крымінальныя абвінавачаньні — такія самыя, як і дарослым», — заявіла Айша Джанг, старшы кіраўнік кампаній Amnesty International у Беларусі.
«Дзецям ва ўзросьце ад васьмі гадоў у школах пагражалі, што над іх палітычна актыўнымі бацькамі ўчыняць расправу. Адной з самых падступных формаў перасьледу і запалохваньня зьяўляецца пагроза выкарыстаньня заканадаўства для канфіскацыі дзяцей зь сем’яў і перадачы іх пад апеку дзяржавы, што фактычна робіць іх закладнікамі дзяржавы», — дадала яна.
Чатырнаццацігадовы Алег (імя зьмененае ў мэтах бясьпекі) быў затрыманы ў Менску 12 жніўня АМАПам разам з сотнямі мірных дэманстрантаў і мінакоў.
«У мікрааўтобусе яго білі, рвалі за валасы, сілком прымусілі разблякаваць тэлефон, прыціснуўшы яго пальцы да экрана», — расказала Amnesty International яго маці.
Супрацоўнікі міліцыі выявілі ў яго ў кішэні невялікую ўлётку зь бел-чырвона-белым сьцягам. Гэтага было дастаткова, каб службы абароны дзяцей занесьлі сямʼю ў сьпіс для назіраньня, заявіўшы, што Алег жыве ў «сацыяльна небясьпечнай сытуацыі».
«Гэты выпадак увасабляе жорсткасьць рэпрэсій, разьвязаных беларускімі ўладамі, якія ідуць на ўсё, каб запалохаць сваіх крытыкаў. Гэтае бесчалавечнае абыходжаньне зь дзецьмі з боку дзяржавы ў палітычных мэтах і непрыгожая кампанія запалохваньня любога іншадумства павінны быць неадкладна спыненыя», — заявіла Айша Джанг.
Amnesty International пачала кампанію #StandWithBelarus 27 студзеня з публікацыі дакладу пра тое, як беларускія ўлады выкарыстоўвалі сыстэму правасудзьдзя для перасьледу ахвяраў катаваньняў, а не злачынцаў.
