Затрымлівалі як на мірных акцыях пратэсту, так і за вывешаныя бел-чырвона-белыя сьцягі на вокнах і іншую сымболіку, піша «Вясна». З палітычных матываў сілавікі правялі ня менш за 873 затрыманьні, 391 затрыманы — жанчыны, 475 — мужчыны. Пад затрыманьні падпалі і 6 непаўналетніх.
У Менску і Менскай вобласьці затрыманьняў было больш за ўсё — 709. Таксама сілавікі затрымалі 37 чалавек у Віцебскай вобласьці, 27 — у Гомельскай, 22 — у Берасьцейскай, 19 — у Горадзенскай, 14 — у Магілёўскай.
Узрост затрыманых самы розны, ад 13 да 72 гадоў.
У студзені суды вынесьлі ня меней за 489 пастановаў у дачыненьні да ўдзельнікаў пратэстаў. Арыштам пакаралі 304 чалавек, штрафам — 137, а 2 — і арыштам, і штрафам. 40 пратаколаў накіравалі на дапрацоўку, і толькі 6 адміністрацыйных справаў спынілі.
24 чалавекі пакараныя максымальным арыштам на 25 сутак (без уліку паўторных арыштаў).
Трое судзьдзяў, якія найбольш рэпрэсавалі мірных пратэстоўцаў:
- Дзьмітры Карсюк — 23 пастановы;
- Марыя Ярохіна — 20;
- Максім Трусевіч — 17.
Судзьдзя суду Цэнтральнага раёну сталіцы Карсюк ва ўсіх магчымых выпадках прысуджаў арышт на тэрмін ад 13 да 25 сутак, а маці непаўналетніх і пэнсіянэрку, якім па законе нельга было прысудзіць арышт, аштрафаваў на 1450 і 870 рублёў адпаведна.
