Удзельнікаў віталі экс-кандыдатка ў прэзыдэнты Сьвятлана Ціханоўская і шэраг палітыкаў Эўразьвязу зь Літвы, Аўстрыі і іншых краін, піша БелаПАН.
«Паўгода таму беларусы прагаласавалі за перамены. Былы прэзыдэнт прайграў, але адмовіўся прыняць выбар народу і пачаў супраць яго тэрор. Значыць, ён прайграў канчаткова: беларусы ніколі не прызнаюць улады, якая выкарыстоўвае гвалт і тэрор», — заявіла Ціханоўская.
Ціханоўская заклікала падтрымаць тых, хто цяпер асабліва пакутуе ад рэпрэсіяў: рабочых, якія ўдзельнічаюць у страйках, лекараў, кнігавыдаўцоў, палітычных зьняволеных, незалежных журналістаў, праваабаронцаў. Палітык заявіла пра неабходнасьць санкцый у дачыненьні да тых, хто нясе адказнасьць за гэтыя рэпрэсіі і фальсыфікацыю выбараў.
Кожны дзень у эўрапейскай краіне павялічваецца колькасьць палітвязьняў, умовы ўтрыманьня ў ізалятарах — катаваньні. Пра гэта сказаў экс-дыплямат, кіраўнік Нацыянальнага антыкрызіснага кіраўніцтва Павал Латушка.
«Мы чытаем навіны зь Беларусі як ваенныя зводкі. І мы гаворым не пра сэрыйных маньякаў. Гэта адбываецца зь людзьмі, якія адстойваюць сваё базавае права — права на свабоду».
Па словах Латушкі, беспакараным застаецца бізнэс, які называюць «кашалькамі рэжыму», і чыноўнікі, якія ўзмацняюць рэпрэсіі. Палітык заклікаў пазьбягаць любой легітымізацыі рэжыму, які будуе канцлягер у цэнтры Эўропы.
У канцы канфэрэнцыі прадставілі Дэклярацыю салідарнасьці.
«Мы захапляемся людзьмі ў Беларусі, якія поўныя рашучасьці мірна адстойваць свае правы, выступаюць супраць фальсыфікацыі вынікаў выбараў, супраць гвалту і рэпрэсій. Мы асабліва цэнім актыўны ўдзел беларускіх жанчын, агульную стойкасьць народу Беларусі, яго прыхільнасьць правам чалавека, дэмакратыі і вяршэнству закону».
Аўтары дакумэнту, сярод іншага, заклікалі да вызваленьня палітвязьняў, дыялёгу аб мірнай перадачы ўлады, адрасных санкцый, эканамічнай падтрымкі дэмакратычнай Беларусі.
