19 студзеня абнавіліся лякальныя тэмпэратурныя мінімумы адразу на васьмі станцыях у Беларусі, піша БелаПАН. Халадней за ўсё ўжо трэці раз за студзень было ў Слуцку — 28,3 градуса марозу. Ранейшы рэкорд нізкай тэмпэратуры ў гэтым горадзе складаў −25,8 градуса ў 1950 годзе.
Перапісаліся рэкорды таксама ў Ганцавічах, дзе тэрмомэтар паказаў 28 градусаў ніжэй за нуль. Тут рэкорд дня пабіты больш як на 4 градусы, у параўнаньні з 2006 годам, калі было −23,8. На балотнай мэтэастанцыі «Палеская» на ўсходзе Берасьцейскай вобласьці амаль на 3 градусы пераўзыдзены паказьнік 36-гадовай даўнасьці, цяпер тут адзначылі −27,3.
Новыя рэкорды пастаўленыя ў Бабруйску: −25,9 (24,9 у 1968 годзе), Акцябрскім: 24,7 са знакам «мінус» (23,3 марозу ў 1977-м), Лельчыцах: 24,4 марозу (−22,6 у 1980-м), Мазыры: −23,2 (23 марозу ў 1977-м) і Высокім: 20,6 ніжэй за нуль (−19,2 у 2006-м).
Усяго за апошнія чатыры ночы абноўлена 27 тэмпэратурных мінімумаў. Аднак, па прагнозах сыноптыкаў, ноч на 20 студзеня стане апошняй, калі тэмпэратура будзе ніжэйшай за 20 градусаў марозу, далей наступіць пацяпленьне.
