Стратэгія Байдэна, якая атрымала назву «Плян выратаваньня Амэрыкі», уключае ў сябе прамыя грашовыя выплаты насельніцтву, дапамогу малому бізнэсу і выдаткі на вакцынацыю.
Паводле Байдэна, «на коне — здароўе нацыі», і дзейнічаць неабходна «проста цяпер». Выгады, якія будуць атрыманыя ў выніку рэалізацыі пляну, «нашмат перасягнуць выдаткі». «Гэтыя інвэстыцыі вернуцца ў выглядзе новых працоўных месцаў..., што прадухіліць доўгатэрміновую эканамічную шкоду. У гэты крызісны момант... мы ня можам дазволіць сабе бязьдзейнічаць», — сказаў Байдэн.
Згодна з плянам, каля аднаго трыльёна даляраў будзе выдаткавана на аднамомантныя выплаты мільёнам амэрыканцаў, рашэньне аб якіх было прынятае ў сьнежні. 415 мільярдаў пойдуць на барацьбу з пандэміяй і вакцынацыю. Яшчэ 440 мільярдаў будуць накіраваныя на падтрымку малога бізнэсу.
Плян Байдэна таксама прадугледжвае падаўжэньне да верасьня мараторыю на высяленьне людзей з арандаванага жыльля і канфіскацыцю банкамі маёмасьці, закладзенай пад гіпатэчныя крэдыты. Дакумэнт таксама прапануе павялічыць у два разы памер мінімальнай заработнай платы на фэдэральным узроўні — да 15 даляраў за гадзіну.
Лідэры дэмакратаў у Кангрэсе ЗША ўжо віталі праграму абранага прэзыдэнта.
