Відавочцы зьнялі гэты момант на відэа і даслалі ў рэдакцыю Tut.by.
Мяркуючы па відэазапісе, невядомы мужчына лаяўся і казаў мэдыку:
«Чуеш? Супраць Лукашэнкі? Што, не верыш? А ты сёньня лекар? Ты ж учора супраць Лукашэнкі... — пасьля гэтых слоў ён ударыў мэдыка ў твар.
У кадры зьявіўся міліцыянт і адвёў нападніка. Мэдык выглядае разгубленым. Падрабязнасьці канфлікту невядомыя.
Ва УУС Берасьцейскага аблвыканкама TUT.BY пацьвердзілі, што інцыдэнт быў 5 студзеня.
«Па гэтым факце Ленінскі РАУС праводзіць праверку», — распавяла афіцыйны прадстаўнік УУС Натальля Сахарчук.
Што сказаў нападнік
Tut.by адшукаў мужчыну, які ўдарыў лекара. Гэта Мікалай, яму 55 гадоў, жыве ў Берасьцейскім раёне, працуе кіроўцам школьнага аўтобуса. Ён кажа, што 5 студзеня быў у Берасьці п’яны, «упаў на прыпынку, разьбіў галаву».
«Да мяне падышлі два амапаўца — ветлівыя хлопцы, выклікалі хуткую дапамогу. А ў мяне такая палітыка — я за цяперашнюю ўладу, за прэзыдэнта. Чаго ім не хапае? Нармальна ж жывем!»
Мужчына ведае пра пратэсты мэдыкаў у Беларусі, гэтай зьявай ён не задаволены. Распавёў, што ў прыёмным аддзяленьні стаў казаць супрацоўнікам хуткай дапамогі, што ён думае пра гэта і пра Лукашэнку — каб самога не прынялі за тых, хто пратэстуе.
«Яны мне сказалі, за каго ты, за каго?. І сталі мяне тузаць, адзін узяў за шыю! Калі б яны мяне не патузалі, я б нікога не ўдарыў!»
Што ўкладвае мужчына ў слова «тузаць», падрабязьней даведацца не ўдалося.
«Апрацавалі рану, абсьледавалі і адпусьцілі. На другі дзень мне патэлефанаваў участковы і сказаў, што трэба сустрэцца».
Пра тое, што відэа з яго паводзінамі ўжо шырока разышлося, мужчына ведае:
«Мне, вядома, сорамна, няёмка, але ўжо як ёсьць».
