Якія былі асаблівасьці маршу ў падтрымку ўльтыматуму? Якія пэрспэктывы страйку? Навошта дзяржсакратар Пампэо тэлефанаваў Лукашэнку? З чым прыяжджаў у Менск шэф расейскай выведкі Нарышкін? Чаму скасавалі «мэгамітынг» у падтрымку Лукашэнкі?
Гэтыя тэмы ў «Праскім акцэнце» абмяркоўваюць мэнэджэр фонду салідарнасьці спартоўцаў, былы дыплямат Анатоль Котаў і палітычныя аналітыкі Арсені Сівіцкі і Валер Карбалевіч.
Карбалевіч
- Гэта быў самы ўдалы марш за ўвесь кастрычнік.
- Ультыматум Ціханоўскай натхніў многіх людзей.
- Яшчэ адзін чыньнік посьпеху маршу — скасаваньне праўладнага мітынгу. Гэта зрабіла дэмаралізуючы ўплыў на прыхільнікаў Лукашэнкі і мабілізуючы — на яго прыхільнікаў.
- Фактарам была і размова з Пампэо — людзі спадзяваліся, што сёньня біць будуць меней.
- Усеагульны страйк у панядзелак наўрад ці адбудзецца.
- Сытуацыя выходзіць з тупіку. Будзе абвастрэньне сытуацыі, улады будуць рэагаваць на страйк жорстка.
Котаў
- Сёньняшнія дзеяньні сілавікоў падштурхнуць заўтрашні страйк.
- Некалькі буйных прадпрыемстваў да страйку далучацца.
- Ціханоўская пакуль не зьяўляецца беларускім Валэнсам, але ўлада сваімі дзеяньнямі ёй дапаможа ім стаць.
- Працягваюцца глупствы з гвалтам супраць мірных пратэстоўцаў.
- Людзі, насуперак прагнозам, выйшлі, значыць, ультыматум працуе.
- Заўтра будзе толькі пачатак агульнанацыянальнага страйку.
- Кастрычнік будзе апошнім месяцам, калі ў дзяржпрадпрыемстваў будуць грошы, каб плаціць заробкі сваім супрацоўнікам.
- У лістападзе ўстане ўся краіна.
- У дыпляматыі ёсьць правіла: калі бакі дамовіліся, супольнае камюніке зьяўляецца адразу. Тут усю ноч Пампэо пісаў у Твітэры пра што заўгодна, але толькі не пра перамовы з Лукашэнкам. І толькі раніцай ЗША паведамілі, што тэмай перамоваў было вызваленьне амэрыканскага грамадзяніна Віталя Шклярава.
- Гэта быў званок чалавеку, які трымае закладніка.
- Трампу перад самымі выбарамі патрэбная хоць бы дробная перамога. І такой перамогай можа стаць вызваленьне Шклярава.
- Званок Пампэо — званок з краіны, якую Лукашэнка прызнае лідэрам сьвету.
- Перамовы Лукашэнкі з Нарышкіным былі няпростыя. Лукашэнка па-ранейшаму спрабуе балянсаваць паміж моцнымі гэтага сьвету.
- Але поле для балянсаваньня ўсё больш звужаецца.
- Калі Шклярава ня вызваляць, гэта будзе азначаць, што Лукашэнка адназначна выбраў Расею.
Сівіцкі
- Лукашэнка не зьбіраецца прымаць «дарожную мапу», якую яму накідае Масква.
- Напрыканцы жніўня ў Менск прылятаў сакратар Рады бясьпекі РФ Мікалай Патрушаў, ён прывёз «дарожную мапу» вырашэньня беларускага крызісу.
- Потым яна абмяркоўвалася ў Сочы 14 верасьня.
- Гэты плян прадугледжвае вызваленьне палітвязьняў, найперш Віктара Бабарыкі, магчыма — Сяргея Ціханоўскага і Віталя Шклярава.
- Таксама пункт пляну — дыялёг паміж Лукашэнкам і новай апазыцыяй, якую спарадзілі сёлетнія выбары.
- Наступны крок — канстытуцыйная рэформа, пераход да парлямэнцка-прэзыдэнцкай сыстэмы і новыя прэзыдэнцкія выбары без Лукашэнкі.
- Імправізацыя Лукашэнкам «круглага стала» ў СІЗА КДБ паказвае, што Лукашэнка гэты плян прымаць ня хоча.
- Яны зразумелі, што ён паспрабуе мабілізаваць Захад, найперш ЗША, на супрацьстаяньне Расеі.
- Сяргей Нарышкін прыехаў, каб нагадаць, што абавязаньні трэба выконваць.
