Удзень 24 верасьня перастала выходзіць на сувязь адвакатка Людміла Казак, якая абараняе Марыю Калесьнікаву, паведаміў Tut.by адвакат Віктар Мацкевіч.
«У 13:50 Людміла рассталася з сваёй калегай, зь якой сустракалася на вуліцы Камуністычнай. Сьпяшалася на судовае паседжаньне. У суд яна не прыехала. Машына прыпаркаваная на Камуністычнай, замкнутая», — паведаміў Мацкевіч.
З 18 гадзін муж Людмілы Казак спрабаваў падаць заяву аб выкраданьні чалавека ў РУУС Цэнтральнага раёну Менску, але паставы міліцыянт сказаў яму, што Людмілы Казак у РУУС няма, а падаць заяву не пусьціў. У выніку заяву падалі ў ГУУС Менгарвыканкаму.
Прэс-сакратарка ГУУС Менгарвыканкаму Натальля Ганусевіч заявіла агенцтву ТАСС, што Людмілу Казак затрымалі за адміністрацыйнае правапарушэньне.
«Так, яна затрыманая за зьдзяйсьненьне адміністрацыйнага правапарушэньня, якога, пакуль не ўдакладняем, яна знаходзіцца ў адным з тэрытарыяльных РУУС Менску», — сказала Ганусевіч.
Пазьней абаронца Людмілы Казак Віктар Мацкевіч паведаміў Tut.by, што адвакатку перавялі ў ізалятар часовага ўтрыманьня на Акрэсьціна. Адміністрацыйны артыкул, паводле якога затрымалі Казак, адвакату не паведамілі. Меркавана, заўтра яе будуць судзіць.
Марыю Калесьнікаву, сябру прэзыдыюму Каардынацыйнай рады для вырашэньня палітычнага крызісу ў Беларусі, 7 верасьня выкрала група невядомых у цэнтры Менску. У ноч на 8 верасьня выявілася, што яна адмовілася зьяжджаць зь Беларусі, разарваўшы пашпарт на беларуска-ўкраінскай мяжы. Празь дзень пасьля гэтага бацьку Марыі пазваніў сьледчы і паведаміў, што дачка знаходзіцца ў СІЗА № 1 на вуліцы Валадарскага.
9 верасьня Сьледчы камітэт Беларусі паведаміў, што Калесьнікава арыштаваная ў справе аб закліках да захопу ўлады. Сама яна ацэньвае тое, што адбылося зь ёй, як выкраданьне.
Заўтра, 25 верасьня, у 11.00 у Менскім гарадзкім судзе меў адбыцца разгляд скаргі на рашэньне суду Партызанскага раёну Менску аб меры стрыманьня для Марыі Калесьнікавай.
