Рабочыя Лукашэнку: «Сыходзь!». Ціханоўская: «Я гатовая». Найважнейшае за 17 жніўня
- Аляксандар Лукашэнка выступіў на Менскім заводзе колавых цягачоў перад працоўнымі. Падчас прамовы ён заявіў, што не зьбіраецца слухацца калектыву і праводзіць новыя выбары. Прысутныя на сустрэчы даслалі Свабодзе відэа, на якім рабочыя скандуюць Лукашэнку «Сыходзь! Сыходзь!». На гэта ён адрэагаваў: «Адказваю вам на гэтае пытаньне: можаце яшчэ пакрычаць».
- Кандыдатка ў прэзыдэнты Сьвятлана Ціханоўская выступіла зь відэазваротам, у якім заявіла, што «гатовая прыняць на сябе адказнасьць і выступіць у гэты пэрыяд у якасьці нацыянальнага лідэра».
- Практычна на ўсіх прадпрыемствах Беларусі ствараюцца страйкавыя камітэты. Пра гэта паведаміў старшыня Беларускага незалежнага прафсаюзу Максім Пазьнякоў. Прыпынілі працу часткова або цалкам «Гроднажылбуд» у Горадні, Беларускі мэталюргічны завод у Жлобіне, «Беларуськалій» у Салігорску. Асноўнае патрабаваньне — адстаўка Лукашэнкі.
- Звольнілі дырэктара Купалаўскага тэатру Паўла Латушку, які ўзяў удзел у «Маршы Свабоды». У жэсьце салідарнасьці з дырэктарам каля 50 супрацоўнікаў тэатру напісалі заявы на звальненьне.
- У Каардынацыйную раду Сьвятланы Ціханоўскай, якая мае забясьпечыць пераход улады ў Беларусі, запісаліся больш за 30 чалавек. Сярод іх нобэлеўская ляўрэатка Сьвятлана Алексіевіч.
- Марыя Мароз, кіраўніца штабу кандыдаткі на прэзыдэнта Сьвятланы Ціханоўскай, зьвярнулася да страйкоўцаў, якія дамагаюцца сумленных выбараў і спыненьня гвалту, і паабяцала ім фінансавую дапамогу.
- Прэзыдэнт ЗША Дональд Трамп назваў сытуацыю ў Беларусі «жахлівай».
- Упершыню за 10 дзён да палітвязьня Віктара Бабарыкі дапусьцілі адвакатаў. Бабарыка ня ведаў пра падзеі ў краіне.
- Мэдыкі каля будынку Міністэрства аховы здароўя пратэставалі супраць гвалту. Яны далі сьведчаньні аб прэцэдэнтных траўмах, якія нанесьлі людзям сілавікі падчас разгону пратэстаў.
- Лідэры пяці асноўных палітычных фракцый Эўрапарлямэнту апублікавалі сумесную заяву з заклікам правесьці новыя, свабодныя выбары ў Беларусі і з асуджэньнем гвалту супраць мірных маніфэстантаў.
БТ расказала аб «правакацыі» супраць Лукашэнкі і абвінаваціла Ціханоўскую ў антырасейскасьці
У перадачы «Панарама» дзяржаўнага тэлеканалу «Беларусь 1» 17 жніўня заявілі, што да сёньняшняй сустрэчы Аляксандра Лукашэнкі з рабочымі Менскага заводу колавых цягачоў «рыхтавалася правакацыя».
«Прэзыдэнта папярэджвалі, што рыхтуецца правакацыя, прапаноўвалі адкласьці візыт на прадпрыемства, але Аляксандар Лукашэнка не зьмяніў рашэньня. Як і чакалася, усё пачалося з крыкаў, як па мэтадычцы».
Таксама ў сюжэце было заяўлена, што ў сваёй перадвыбарчай праграме Сьвятлана Ціханоўская нібыта абяцала разарваць усе сувязі і закрыць мяжу з Расеяй. Агульная танальнасьць БТ не памянялася. Тэлеканал АНТ у навінных выпусках апошніх дзён стаў падаваць інфармацыю больш збалянсавана і нэўтральна. Цалкам чытайце па спасылцы.
Паліттэхноляг Віталь Шкляраў: «Мяне пакуль ня б’юць, але спрабуюць зламаць»
Заяву палітвязьня, паліттэхноляга Віталя Шклярава апублікаваў на сайце «Эхо Москвы» яго адвакат Антон Гашынскі.
«Як і ўсякі чалавек, якія наважыўся крытыкаваць аўтарытарныя рэжымы, я разумеў, што заракацца ад турмы ня варта. Але калі мяне арыштавалі, я ўсё ж не чакаў, што траплю ў таталітарны засьценак. Надоўга. Нібы нейкая гнюсная машына часу адправіла мяне ў ГУЛАГ. Не, мяне пакуль ня бʼюць. Але спрабуюць зламаць. Усімі сіламі. Ціснуць, выкарыстоўваюць махровыя лягерныя мэтады». Цалкам чытайце тут.
Прэс-сакратар МЗС Беларусі Анатоль Глаз пацьвердзіў БелаПАН адстаўку кіраўніка дэпартамэнту Паўночнай Амэрыкі і Заходняй Эўропы Андрэя Бушылы.
Раней зьявіліся паведамленьні пра сыход Бушылы на знак пратэсту супраць дзеяньняў уладаў. На яго старонцы ў «Фэйсбуку» 16 жніўня зьявіўся рэпост фатаграфіі з Маршу свабоды ў Менску.
Раней пра сваю грамадзянскую пазыцыю заявіў беларускі амбасадар у Славаччыне Ігар Ляшчэня.
МЕНСК. Пратэстоўцы прыйшлі на Акрэсьціна
Каля 22-й гадзіны пратэстоўцы дайшлі да парку вакол ізалятара на Акрэсьціна, спыніліся і пачалі скандаваць: «Свабоду!», «Трыбунал», паведамляе Tut.by. Валянтэры папрасілі людзей супакоіцца, таму што «затрыманым будзе яшчэ горш».
Адзін зь лідэраў калёны сказаў, што многія з тых, хто прыйшоў, сядзелі на Акрэсьціна, і самым важным для іх былі словы падтрымкі. Калёна падтрымала яго і пачала скандаваць: «Свабоду!» і «Давай!». Да будынку ізалятара прапусьцілі прэсу.
Валянтэры казалі, што сюды мае пад'ехаць прадстаўніца абʼяднанага штабу Марыя Калесьнікава, але замест яе прыехала прадстаўніца штабу Ціханоўскай Вольга Кавалькова. Як сказала Кавалькова, ёй абяцалі, што да грамадзкасьці выйдзе прадстаўнік ізалятара, але так ніхто і ня выйшаў. Ёй толькі сказалі, што «тут няма палітычных зьняволеных».
Кавалькова выйшла да пратэстоўцаў і сказала, што ўначы «мы нічога ня зможам вырашыць», бо прадстаўнікі ізалятара і МУС не ідуць на кантакт, і прапанавала сабрацца на Акрэсьціна заўтра раніцай ці днём. Пратэстоўцы пачалі разыходзіцца.
Прэм’ер Польшчы паабяцаў Сьвятлане Ціханоўскай падтрымліваць беларусаў
Прэм'ер-міністар Польшчы Тадэвуш Маравецкі 17 жніўня правёў тэлефонную размову з кандыдаткай у прэзыдэнты Беларусі Сьвятланай Ціханоўскай і выказаў падтрымку беларусам.
«Я гаварыў праз тэлефон са Сьвятланай Ціханоўскай. Я запэўніў, што беларусы маюць поўную падтрымку Польшчы як у імкненьні да свабоды сваёй айчыны, так і ў паўсядзённым жыцьці ў Польшчы. Сёння, праз 40 гадоў пасьля жнівеньскіх пагадненьняў (паміж прафсаюзам „Салідарнасьць“ і камуністычнымі ўладамі. — РС), нам зноў патрэбная гэтая салідарнасьць», — напісаў Маравецкі ў Твітэры.
Мэркель не размаўляла з Лукашэнкам пасьля выбараў 9 жніўня
Пра гэта заявіў прэсавы сакратар нямецкага ўраду, паведамляе Reuters. Такім чынам, Бэрлін абверг заяву, якую зрабіў Аляксандар Лукашэнка сёньня раніцай. Выступаючы на МЗКЦ, ён сказаў: «Ужо ўчора тэлефануе Мэркель: „Я хачу паразмаўляць“. Гэтыя — Наўседа там і іншыя. „Мы хочам паразмаўляць“. Ня трэба мяне нахіляць ні з Захаду, ні з Усходу».
АБСЭ прапануе візыт у Беларусь для перамоваў з удзельнікамі супрацьстаяньня
«Афіцыйную прапанову аб візыце дзейнага старшыні АБСЭ, прэм’ер-міністра, міністра замежных спраў і па справах Эўропы Эдзі Рамы і будучага старшыні АБСЭ, міністра замежных спраў Швэцыі Ан Ліндэ накіравалі ўраду Беларусі для сустрэчы з урадам і прадстаўнікамі апазыцыі», — паведамілі ў прэс-службе АБСЭ.
«Мы паўтараем нашу занепакоенасьць правядзеньнем прэзыдэнцкіх выбараў 9 жніўня, за якімі не магло назіраць Бюро дэмакратычных інстытутаў і правоў чалавека АБСЭ, непрапарцыйным ужываньнем сілы ў дачыненьні да мірных дэманстрантаў, масавымі затрыманьнямі і паведамленьнямі аб катаваньнях і злоўжываньнях сілавых структур. Для таго каб знайсьці дарогу наперад, неабходны адкрыты і канструктыўны дыялёг у Беларусі. АБСЭ гатовая падтрымаць яго і прыцягнуць да размовы ўсе бакі», — гаворыцца ў заяве ад імя цяперашняга старшынства Альбаніі ў АБСЭ.
Супрацоўніца «Нафтану» зачытвае патрабаваньні працоўных. ВІДЭА
17 жніўня супрацоўнікі наваполацкіх прадпрыемстваў «Нафтан» і «Палімір» сабраліся каля будынкаў заводакіраўніцтва, каб працягнуць дыялёг з начальствам.
Патрабаваньні працоўнага калектыву нафтаперапрацоўшчыкаў Наваполацку было даверана агучыць Вользе Брыцікавай, начальніцы аддзелу рэалізацыі нафтапрадуктаў ААТ «Нафтан». Першым з гэтых патрабаваньняў была адстаўка Аляксандра Лукашэнкі. Цалкам чытайце па спасылцы.
Сьледчы камітэт зьняпраўдзіў інфармацыю пра пяць ахвяраў вулічных пратэстаў
Афіцыйны прадстаўнік СК Сяргей Кабаковіч заявіў БелаПАН, што зарэгістраваныя дзьве сьмерці: адна ў Менску і адна ў Гомлі, і «па абодвух выпадках сьледчыя разьбіраюцца».
Ён падкрэсьліў, што іншых выпадкаў сьмерці падчас масавых акцый у Беларусі не зарэгістравана. Калі грамадзяне альбо праваабарончыя арганізацыі валодаюць фактамі пра іншыя сьмерці, СК просіць іх зьвярнуцца ў яго тэрытарыяльныя органы альбо абласныя ўпраўленьні камітэту і расказаць пра гэта. «І мы неадкладна будзем з гэтым разьбірацца», — запэўніў Кабаковіч. Цалкам чытайце па спасылцы.
ВІЦЕБСК. Сустрэча прадстаўнікоў улады і дэлегатаў ад гараджан доўжылася 4 гадзіны
У Віцебску завяршылася сустрэча прадстаўнікоў улады і дэлегатаў ад гараджан, яна доўжылася чатыры гадзіны. Са словаў Яўгеніі Пачэпкі, прадстаўніцы YMCA Belarus у Віцебску, нават здымачную групу дзяржаўных СМІ на сустрэчу не пусьцілі.
Дэлегатка кажа, што вельмі доўга абмяркоўвалі затрыманьні і дзеяньні сілавых структураў. У аблвыканкаме паведамілі, што загаду жорстка абыходзіцца зь людзьмі не давалі. Усе пытаньні адносна затрыманьняў гараджане змогуць задаць ад заўтра па гарачай лініі.
Пытаньні адносна выбараў мусяць быць накіраваныя ў ЦВК, патлумачылі ў аблвыканкаме. На Сяргея Сташэўскага, старшыню Кастрычніцкага выканкаму, які прымушаў выбарчую камісію перапісаць пратакол на карысьць дзейнага прэзыдэнта, падалі дзьве заявы ў пракуратуру. Вядзецца праверка.
У аблвыканкаме паабяцалі, што сустрэчы ў такім фармаце будуць адбывацца і надалей. Выхаду дэлегатаў дачакаліся 100–150 чалавек.
У Жодзіне дырэктара мясцовага тэлеканалу звольнілі за «відэа з гвалтоўнымі разгонамі пікетаў»
У Жодзіне звольнілі кіраўніка «Тэлевізійнага Жодзінскага тэлеканалу» Эльшада Акберава «з прычыны трансьляцыі відэа з гвалтоўнымі разгонамі пікетаў і меркаваньняў замежных палітолягаў пра сытуацыю ў Беларусі», гаворыцца ў пратаколе агульнага сходу ўдзельнікаў ТАА «Тэлевізійны Жодзінскі тэлеканал», піша Interfax.by.
У пратаколе пазначана, што на сходзе прысутнічалі два чалавекі, у руках якіх знаходзіцца статутны фонд ТАА. Яны аднагалосна пастанавілі адхіліць Акберава ад працы, а таксама спыніць вяшчаньне тэлеканалу і ўсіх сацыяльных сетак ад імя ТАА «Тэлевізійны Жодзінскі тэлеканал».
Некалькі тысяч чалавек сабралася ля сьцен Валадаркі
Некалькі тысяч чалавек прыйшлі ўвечары 17 жніўня да СІЗА № 1 на вуліцы Валадарскага ў Менску, паведамляе Tut.by.
Пляцоўка ля СІЗА на Валадарскага запоўненая цалкам. Па розных ацэнках, тут 5–7 тысяч чалавек. Яны стаяць на ходніках і праезнай частцы. ДАІ перакрыла рух. Усе ахвотныя выступаюць у рэжыме вольнага мікрафона. Людзі пэрыядычна скандуюць: «Выпускай!», «Лукашэнку ў аўтазак», «Ярмошыну ў турму», «Караева пад суд».
Сярод бел-чырвона-белых сьцягоў каля мікрафона быў таксама і сьцяг Эўразьвязу, але ўдзельнікі акцыі доўга скандавалі: «Прыбяры чужы сьцяг», і сіні сьцяг у выніку зьнялі.
Пасьля людзі калёнай рушылі ад СІЗА на вуліцы Валадарскага да ізалятара на завулку Акрэсьціна.
ВІЦЕБСК. Перамовы ўладаў з дэлегацыяй гараджан доўжацца больш за 3 гадзіны
Амаль тры гадзіны доўжацца перамовы прадстаўнікоў улады з дэлегацыяй гараджан у аблвыканкаме ў Віцебску. Некаторыя дэлегаты ўжо пачалі выходзіць. Па іх словах, перамовы ня маюць сэнсу.
Паводле Аляксандра Якушкова, актывіста «Народнай грамады», на сустрэчы прысутнічаюць старшыня аблвыканкаму Мікалай Шарсьнёў, прадстаўнікі УУС, Сьледчага камітэту, пракуратуры, а таксама прадстаўнік прэзыдэнта ў Віцебскай вобласьці і кіраўнік Віцебску Вадзім Заранкін. Да людзей прадстаўнікі ўлады так і ня выйшлі. Толькі ўзмацнілі ахову на ўваходзе.
Дзяржаўная тэлевізія Горадні ўключыла жывую трансьляцыю акцыі пратэсту ў цэнтры гораду
Мітынг на плошчы Леніна ў Горадні сабраў каля 10 тысяч чалавек. На патрабаваньні пратэстоўцаў выйшлі адказваць прадстаўнікі ўлады.
Са сцэны выступіў жыхар Пецярбургу Аляксей Абрамаў. Ён прыехаў у Горадню як турыст. Яго затрымалі на мінулым тыдні, калі ён ішоў па вуліцы ў вышыванцы. Па ягоных словах, яго шматкроць зьбівалі і катавалі. Знайшлі пры ім 200 даляраў і дапытвалі, нібыта ён некаму плаціў грошы, каб дэстабілізаваць сытуацыю ў краіне.
Аляксей зьняў на сцэне вышыванку і паказаў вялікія сінякі на целе і руках. Яго трымалі ў зьняволеньні тыдзень і вызвалілі ўвечары 17 жніўня, пасьля таго як пратэстоўцы высунулі свае патрабаваньні да ўладаў.
Штаб Ціханоўскай абяцае падтрымку страйкоўцам і сілавікам, якія звальняюцца
Штаб Святланы Ціханоўскай заяўляе:
1. Усім супрацоўнікам і вайскоўцам сілавых структур, якія звольніліся празь нежаданьне быць катамі свайго народу, будзе дадзеная магчымасьць аднаўленьня на службе. Іх грамадзянская пазыцыя ў гэтыя складаныя дні будзе ўлічвацца пры прыняцьці кадравых рашэньняў і прасоўваньня па службовай лесьвіцы ў новай, вольнай Беларусі.
2. Усе звольненыя праз удзел у страйках будуць адноўленыя на сваіх працоўных месцах, і ім, акрамя падтрымкі з фондаў дапамогі страйкоўцам і пацярпелым, будзе пакрыты страчаны заробак за кошт дзяржаўнага бюджэту.
3. Службовыя асобы органаў улады, прадпрыемстваў, устаноў і арганізацый, якія маюць дачыненьне да супрацьпраўных звальненьняў страйкоўцаў, будуць абавязаныя кампэнсаваць усе выдаткі бюджэту на пакрыцьцё заробку звольненым удзельнікам страйкаў. Цалкам чытайце па спасылцы.
У Магілёве зноў «ланцуг салідарнасьці». Давераная асоба Ціханоўскай заклікала пратэстоцаў не хадзіць на мітынг у падтрымку Лукашэнкі
У Магілёве людзі зноўку сталі ў «ланцуг салідарнасьці».
Каля паўтысячы чалавек сабраліся каля Магілёўскага гарвыканкаму. Частка патрабавала сустрэчы з «мэрам» Уладзімерам Цумаравым, але на той момант у будынку яго не было, бо скончыўся працоўны дзень.
Кіраўнік абласной арганізацыі АГП, былая давераная асоба Сьвятланы Ціханоўскай — Уладзімер Шанцаў заклікаў мясцовых пратэстоўцаў не хадзіць на мітынг у падтрымку Лукашэнкі, які арганізуе 18 жніўня аблвыканкам.
Сваю пазыцыю ён патлумачыў тым, што на мітынг на плошчы Леніна «згоняць» удзельнікаў прымусова, а тых, хто ня згодны з вынікамі выбараў і прыйдзе на мітынг, ідэолягі выкарыстаюць у прапагандысцкіх мэтах, каб паказаць свае посьпехі.
Шанцаў прапанаваў у адказ на праўладны мітынг арганізаваць свой ля гарвыканкаму. Частка пратэстоўцаў прапанову актывіста падтрымала.
«Будучыня — жаночая». Плякаты на Маршы Свабоды ў Менску 16 жніўня 2020 (1). ШМАТ ФОТА