Відэазварот Сьвятланы Ціханоўскай, у якім яна з паперкі зачытала зварот да сваіх прыхільнікаў з заклікам не выходзіць на акцыі пратэсту, запісаны ў пакоі старшыні Цэнтральнай выбарчай камісіі Лідзіі Ярмошынай.
Мэбля і інтэр’ер у пакоі, дзе запісаны відэазварот Ціханоўскай, такія ж самыя, што і на многіх фатаздымках Лідзіі Ярмошынай у працоўным кабінэце.
Як расказала сёньня на прэсавай канфэрэнцыі прадстаўніца штабу Віктара Бабарыкі, учора Ціханоўская наведала сядзібу ЦВК, каб скласьці скаргу на вынікі выбараў. Некалькі гадзінаў яе пратрымалі ў пакоі Лідзіі Ярмошынай высокапастаўленыя сілавікі. У пакой у гэты час заходзіў чалавек зь відэаабсталяваньнем. Пасьля гэтага сувязь з Ціханоўскай зьнікла.
Як паведаміў памежны камітэт Беларусі, а 3.30 уначы яна перайшла беларуска-літоўскую мяжу. Цяпер кандыдатка ў прэзыдэнты знаходзіцца ў Літве.
