У санітаркі Вясноўскага дому-інтэрнату для дзяцей-інвалідаў з асаблівасьцямі псыхафізычнага разьвіцьця, што ў Глускім раёне на Магілёўшчыне, выявілі каранавірусную інфэкцыю. Кіраўніцтва кажа, што санітарна-эпідэміялягічная абстаноўка пад кантролем, інтэрнат працягвае працаваць.
Вядома, што ў інтэрнат выяжджаў з Магілёва інфэкцыяніст. Работніцу з каранавірусам шпіталізавалі.
«Так, у нас ёсьць работніца, якая захварэла на каранавірус, — пацьвердзіў дырэктар установы Вячаслаў Клімовіч. — Санітарка цяпер у бальніцы. За сытуацыяй сочаць усе службы».
Паводле яго, жанчыну забралі ў шпіталь, калі яна зьбіралася выходзіць на зьмену. Дагэтуль яе на працы ня бачылі пяць дзён. Ці працавала яна ў інтэрнаце зь вірусам, суразмоўца пэўна казаць не бярэцца.
«Інкубацыйны пэрыяд каранавірусу ж 14 дзён, таму гадаць можна па-рознаму...» — кажа ён.
Вясноўскі дом-інтэрнат за 18 кілямэтраў ад Глуску. У ім 170 гадаванцаў, якія маюць патрэбу ў спэцыяльным навучаньні, асаблівым клопаце, бытавым і мэдычным абслугоўваньні. У бальшыні бацькі пазбаўленыя бацькоўскіх правоў ці самі адмовіліся ад дзяцей з асаблівасьцямі разьвіцьця.
Паводле дадзеных Мінздароўя Беларусі, на 20 красавіка ў Магілёўскай вобласьці было 265 пацьверджаных выпадкаў захворваньня на COVID-19
Матэрыял падрыхтаваны пры дапамозе інфармацыі БелаПАН.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
