Зорка Галівуду, прэзыдэнт, вядомыя спартоўцы — захварэць на COVID-2019 можа кожны

Захварэць на COVID-2019 можа як прэзыдэнт, які раней называў распаўсюд вірусу на плянэце «выдумкай», так і дыплямат ААН ці спартовая зорка. Свабода склала сьпіс вядомых асобаў, якія былі інфікаваныя каранавірусам.

Прэзыдэнт Бразыліі, які адмаўляў маштаб эпідэміі, здаў тэст на COVID-2019

Прэзыдэнт Бразыліі Жаір Балсанару здаў тэст на каранавірус. Раней стала вядома, што Фабіа Вайнгартэн — кіраўнік сакратарыяту грамадзкіх камунікацыяў пры адміністрацыі бразыльскага прэзыдэнта — інфікаваны. 7 сакавіка абодва яны сустракаліся з амэрыканскім прэзыдэнтам Дональдам Трампам у яго рэзыдэнцыі ў штаце Флорыда. 10 сакавіка Жаір Балсанару заяўляў, што маштабы распаўсюджваньня новага каранавірусу ў сьвеце — «збольшага выдумка». Сам Трамп заявіў, што не адчувае ніякай трывогі і ня будзе рабіць тэсту.

Вядомыя спартоўцы захварэлі на каранавірус

У ангельскай футбольнай прэм’ер-лізе інфікаваліся галоўны трэнэр лёнданскага «Арсэналу» Мікель Артэта і паўабаронца «Чэлсі» Калум Хадсан-Адаі. Увесь асноўны склад каманды і пэрсанал клюбу, якія мелі кантакты з Артэта, знаходзяцца ў двухтыднёвай самаізаляцыі. Трэнавальны цэнтар «Арсэналу» закрыты, найбліжэйшыя матчы клюбу ў чэмпіянаце Англіі адмененыя. Клюб «Чэлсі» таксама ідзе ў карантын.

11 сакавіка СМІ паведамілі, што каранавірус знойдзены ў абаронцы італьянскага футбольнага клюбу «Ювэнтус» Даніэле Ругіні і баскетбаліста каманды «Юта Джаз» Рудзі Гобэра. Яшчэ адзін прадстаўнік італьянскай Сэрыі А, нападнік «Сампдорыі» Манола Габʼядзіні здаў станоўчы тэст на каранавірус. Падазрэньне на тую ж інфэкцыю і ў траіх гульцоў «Лестера» з ангельскай Прэмʼер-лігі.

Усе матчы, заплянаваныя на наступны тыдзень у рамках Лігі чэмпіёнаў і Лігі Эўропы, адкладзеныя на няпэўны тэрмін праз сытуацыю з распаўсюдам каранавірусу. Пра гэта гаворыцца ў заяве Саюзу эўрапейскіх футбольных асацыяцый (УЕФА).

У 39-павярховым будынку ААН у Нью-Ёрку першы выпадак інфэкцыі

Інфікаваная адна зь філіпінскіх дыпляматак. Апошні раз яна была на працы 9 сакавіка і правяла ў штаб-кватэры сусьветнай арганізацыі каля паўгадзіны. Усе супрацоўнікі прадстаўніцтва Філіпін пры ААН зьмешчаныя ў карантын, доступ да іх сэкцыі перакрыты. У комплекс будынкаў у Манхэтане, дзе праходзіць большасьць пасяджэньняў Генэральнай асамблеі і Рады Бясьпекі ААН, перасталі пускаць наведнікаў.

Сярод інфікаваных палітыкаў — чалец парлямэнту Вялікай Брытаніі і міністарка бясьпекі пацыентаў Надзін Дорыс, першы віцэ-прэзыдэнт Ірану Эсхаке Джахангір, міністарка прамысловасьці і гандлю Ірану Рэза Рахмані і міністар культурнай спадчыны і турызму Ірану Алі Мунесан, дарадца аяталы Алі Хамэнэі Алі Акбар Велаяці.

Прэмьʼер Канады пайшоў у карантын усьлед за інфікаванай жонкай

Прэмʼер-міністар Канады Джастын Трудо самаізаляваўся пасьля таго, як у ягонай жонкі Сафі Грэгуар-Трудо зьявіліся прыкметы грыпу па вяртаньні зь Лёндану. Пасьля тэст на каранавірус аказаўся станоўчым. Трудо працягне двухтыднёвы карантын. Паведамляецца, што Сафі Грэгуар-Трудо «адчувае сябе добра», яе сымптомы не пагаршаюцца. Сам Трудо пачуваецца добра. У яго няма сымптомаў заражэньня, ён ня будзе праходзіць тэст на каранавірус.

Сярод інфікаваных COVID-2019 — актор Том Хэнкс і ягоная жонка Рыта Ўілсан

Амэрыканскі актор Том Хэнкс расказаў, што вынік тэсту на каранавірус, які яны з жонкай Рытай Уілсан прайшлі ў Аўстраліі, станоўчы. 63-гадовы Хэнкс і яго жонка зьвярнуліся па мэдыцынскую дапамогу, калі ў іх зьявіліся сымптомы прастуды. Цяпер яны будуць у самаізаляцыі. Сужэнцы былі ў Аўстраліі, на Залатым беразе Квінслэнду, дзе Хэнкс працаваў над фільмам пра жыцьцё Элвіса Прэсьлі.