13 лютага ў Менску адкрылася амбасада Швайцарыі. Яна разьмешчаная па адрасе плошча Свабоды,11.
Рашэньне аб пераўтварэньні пастаяннага прадстаўніцтва Швайцарыі ў Беларусі ў паўнавартасную амбасаду Фэдэральная рада Швайцарыі прыняла ў траўні 2019 году.
З гэтай нагоды ў Менск прыбыла дэлегацыя на чале з кіраўніком Фэдэральнага дэпартамэнту замежных спраў Швайцарыі Іньняцыё Касісам. Раніцай з дэлегацыяй сустрэўся Аляксандар Лукашэнка.
«Нам ёсьць куды расьці, асабліва ў сфэры гандлёва-эканамічных адносінаў. Эканоміка — галоўнае. Мы гатовыя даць швайцарскаму бізнэсу самыя выгадныя ўмовы для інвэставаньня», — заявіў Лукашэнка, якога цытуе БелТА.
Кантакты паміж Беларусьсю і Швайцарыяй актывізаваліся пасьля адмены санкцый Эўразьвязу ў дачыненьні да афіцыйнага Менску ў 2016 годзе:
- У 2017 годзе ў Фэдэральным сходзе Швайцарыі ўпершыню была створаная парлямэнцкая група дружбы зь Беларусьсю.
- У 2018 годзе Швайцарыю з афіцыйным візытам наведаў старшыня Палаты прадстаўнікоў Уладзімер Андрэйчанка, у 2019-м — першы намесьнік прэм’ер-міністра і старшыня праўленьня Нацбанку.
- У траўні 2019 году Фэдэральная рада Швайцарыі прыняла рашэньне аб павышэньні ўзроўню дыпляматычнага прадстаўніцтва ў Беларусі, а ў верасьні амбасадар Швайцарыі ў Беларусі Клод Альтэрмат уручыў Лукашэнку даверчыя лісты.
Швайцарыя прысутнічае ў Беларусі з 2010 году ў фармаце прадстаўніцтва («пасольскага бюро» / Botschaftsbüro). Беларусь жа мае ў Бэрне сваю амбасаду.
У МЗС Канфэдэрацыі Швайцарыі раней падкрэсьлівалі, што павышэньне статусу і ўзроўню дыпляматычнай прысутнасьці Швайцарыі ў Менску будзе шчыльна ўвязанае з узмацненьнем увагі Швайцарыі да выкананьня правоў чалавека.
