Лябараторныя дасьледаваньні не пацьвердзілі наяўнасьць каранавіруса новага тыпу 2019-nCoV ў пацыенткі Менскага інфэкцыйнага шпіталя, якая нядаўна вярнулася з Кітаю.
Пра гэта паведаміла журналістам прэс-сакратарка Міністэрства аховы здароўя Юлія Барадун, піша БелаПАН.
«У дзяўчыны „грып тыпу В“. Каранавірус не пацьвердзіўся ні ў яе, ні ў яе хлопца (малады чалавек знаходзіцца ў шпіталі ў Санкт-Пецярбургу. — Рэд.)», — сказала Юлія Барадун.
Дзяўчыну даставілі ў Менскі інфэкцыйны шпіталь са скаргамі на боль у цягліцах і тэмпэратурай 38,5°С. Яна расказала, што 20 студзеня вярнулася з Шанхаю.
23 студзеня кансыліюм з удзелам галоўнага лекара інфэкцыйнага шпіталя Мікалая Юроўскага і прафэсара, загадчыка катэдры інфэкцыйных хваробаў БДМУ Ігара Карпава паставіў дыягназ, пацьверджаны цяпер лябараторна: грып тыпу B сярэдняй ступені цяжкасьці. Але, каб выключыць напластаваньне каранавіруснай інфэкцыі, праводзілася дадатковае лябараторнае дасьледаваньне.
Пра тое, што ў дзяўчыны падазраюць кітайскі каранавірус, казаў ейны хлопец. Яго таксама правяралі на гэты вірус, калі ён прыляцеў з Кітаю ў Санкт-Пецярбург, але папярэдне дыягнаставалі звычайную вострую рэсьпіраторна-вірусную інфэкцыю. Хлопец наракаў, што ў Менску дзяўчыне дапамагаюць, але недастаткова, каб «высьветліць хутчэй дыягназ і прыступіць да лячэньня».
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
