Віленскі аэрапорт ацаніў свае страты ад часовага закрыцьця паветранай прасторы ў ноч на 5 кастрычніка ў 14,5 тысячы эўра, паведаміў Delfi.
Прычынай сталася зьяўленьне ў небе над аэрапортам паветраных балёнаў, якія выкарыстоўваюць кантрабандысты для перапраўкі цыгарэтаў зь Беларусі.
«Закрыцьцё аэрапорта закранула амаль 5000 пасажыраў і 30 рэйсаў, зь якіх 14 былі скасаваныя. Паводле папярэдніх ацэнак, непасрэдныя даходы ад збораў не былі атрыманыя на суму каля 14,5 тысячы эўра», — заявіла прадстаўніца дзяржаўнай кампаніі Віталія Рочэ.
Акрамя таго, страты зазналі ня толькі аэрапорты, але і авіякампаніі, кампаніі наземнага абслугоўваньня і самыя пасажыры.
Гэта ня першы падобны інцыдэнт. Раней паветраную прастору над Віленскім аэрапортам ужо закрывалі праз падазроныя абʼекты 9, 11 і 25 верасьня.
Што адбылося?
У ноч на 5 кастрычніка ў Літву і Польшчу заляцела не менш як 26 паветраных балёнаў з цыгарэтамі. Адзін зь іх упаў на польскай тэрыторыі, астатнія апынуліся на літоўскай. Аэрастаты, якія на той момант знайшлі ў Літве, былі заладаваныя тытунёвымі вырабамі.
Паводле прадстаўніка цэнтру кіраваньня крызісамі Даруса Буты, якога цытуе агенцтва BNS, паветраныя балёны прыляцеі зь Беларусі. У Вільні і Віленскім раёне заўважылі 13-14 балёнаў, два зь іх над Віленскім аэрапортам.
Праз гэта працу аэрапорту былі прыпынілі. Адны рэйсы адклалі, іншыя скасавалі. Паветраны рух аднавілі а 4:50 раніцы.
Падобная колькасьць балёнаў з кантрабандай была зафіксаваная ў жніўні. Тады іх было 26.
Таксама кантрабандысты выкарыстоўваюць дроны. Сёлета літоўскія памежнікі перахапілі каля паўсотні бесьпілётнікаў з цыгарэтамі.
Форум