Каля 15:30 16 студзеня ў двары прыватнага дома на вуліцы Лебядзінай у Баранавічах адбыўся выбух невядомай прылады, расказвае раённая газэта «Наш край».
Паводле сьведкаў, 72-гадовы гаспадар дома разам з сынам і суседам размаўлялі ў двары — адзін зь іх пнуў нагой «мэталёвую балванку», што ляжала ля гаража, адбыўся выбух.
40-гадоваму мужчыну адарвала дзьве нагі да каленаў. Яшчэ адзін мужчына траўмаваны — папярэдне кажуць, што ў яго раздробленыя некалькі костак. У гаспадара дома засталіся драпіны.
На месцы працуюць сапёры, міліцыя, ратавальнікі, сьледчыя і КДБ. Праводзіцца праверка, распачатая экспэртыза. Як піша Intex-press, на месцы знайшлі яшчэ два снарады часоў Другой сусьветнай вайны.
