З 2021 году ў Беларусі плянуюць абмежаваць выкарыстаньне плястыкавага посуду ва ўстановах грамадзкага харчаваньня, і абмежаваць максымальную ёмістасьць палімэрнай тары для разьліву піва і слабаалькагольных напояў да 1 літра.
Зьмены прадугледжаныя пастановай Савета міністраў Беларусі № 7 ад 13 студзеня, якой зацьверджаны плян мерапрыемстваў па паэтапным зьніжэньні выкарыстаньня палімэрнай упакоўкі ў Беларусі з заменай яе на экалягічна бясьпечную.
Плянам прадугледжаныя:
- арганізацыя паасобнага збору адходаў пры правядзеньні масавых мерапрыемстваў;
- укараненьне дэпазытнай (закладной) сыстэмы звароту спажывецкай упакоўкі (2020-2021 год);
- забарона на выкарыстаньне і продаж некаторага аднаразовага плястыкавага посуду ў грамадзкім харчаваньні (з 1 студзеня 2021 году),
- паэтапнае зьніжэньне максымальнай ёмістасьці палімэрнай тары для разьліву піва і слаба алькагольных напояў да 1 літра ўключна (2021 год),
- стварэньне аб’ектаў па сартаваньні і выкарыстаньні цьвёрдых камунальных адходаў, у тым ліку па перапрацоўцы адходаў палімэрнай упакоўкі,
- павелічэньне вытворчых магутнасьцяў па выпуску шкляной тары і па сартаваньні зьмешанага шклабою,
- абмежаваньне ўвозу ў Беларусь розных відаў плястыкавай упакоўкі,
- павелічэньне абʼёмаў вытворчасьці экалягічна бясьпечнай (у тым ліку папяровай, шкляной, біяраскладальнай) упакоўкі і арганізацыя вытворчасьці сыравіны для яе
і інш.
