Празь некалькі гадзін пасьля пахаваньня іранскага генэрала Касэма Сулеймані, забітага ў выніку авіяўдару ЗША 3 студзеня, Іран зрабіў атаку ў адказ на амэрыканскія вайсковыя аб’екты ў Іраку.
8 студзеня Тэгеран запусьціў больш за дзесяць балістычных ракет з тэрыторыі Ірану ў напрамку як мінімум двух ірацкіх вайсковых базаў, на якіх разьмяшчаюцца войскі ЗША, паведамілі ўвечары ў аўторак у Пэнтагоне.
ЗША пачалі ацэнкі пашкоджаньняў на вайсковых базах, якія трапілі пад атаку,— Айн Асад і Эрбіл.
Іранскі ісламскі рэвалюцыйны гвардзейскі корпус узяў на сябе адказнасьць за атакі, паведамілі іранская дзяржаўная тэлевізія і дзяржаўныя інфармагенцтвы.
Прэзыдэнт ЗША Дональд Трамп заявіў у Twitter, што ідзе ацэнка ўчыненай шкоды, але пакуль «усё нармальна». Паводле Fox News, што спасылаецца на прадстаўніка амэрыканскага войска ў Багдадзе, чалавечых ахвяраў атакі няма.
Фэдэральнае агенцтва авіяцыі ЗША ў аўторак абвясьціла пра забарону на палёты амэрыканскіх перавозчыкаў над Іракам, Іранам, Аманскім залівам і водамі паміж Іранам ды Саудаўскай Арабіяй. Забарона зьвязаная з ракетнымі атакамі Ірану на амэрыканскія войскі, разьмешчаныя ў Іраку, паведамляе «Голас Амэрыкі».
