Рэпкаўскі раённы суд Чарнігаўскай вобласьці аштрафаваў грамадзяніна Беларусі за спробу перамясьціць з Украіны ў Беларусь 0,56 грама канабісу.
Як адзначалася на судовым пасяджэньні, беларус, які працуе шэф-кухарам у адным зь менскіх рэстаранаў, схаваў пакунак з наркатычным рэчывам у шкарпэтку. Марыхуану выявіў службовы сабака ўкраінскіх памежнікаў.
Пасьля выяўленьня марыхуаны беларуса не затрымлівалі і не арыштоўвалі (як, напрыклад, у выпадку зь беларускім журналістам Уладзімерам Чудзянцовым, якога затрымалі ў цягніку на дарозе ў Варшаву зь нібыта 0,87 грама марыхуаны).
Паводле ўкраінскага заканадаўства, беларусу пагражала пазбаўленьне волі на тэрмін ад 8 да 10 гадоў з канфіскацыяй маёмасьці, але суд улічыў невялікую колькасьць сканфіскаванага наркатычнага рэчыва, актыўную супрацу са сьледзтвам, прызнаньне віны, брак нарказалежнасьці і намераў прадаваць марыхуану ў Беларусі. Зыходзячы з гэтага, суд прызначыў беларусу штраф у 20,4 тысячы грыўні (прыблізна 1,6 тысяч беларускіх рублёў).
Што пагражала б за гэта ў Беларусі
У Беларусі за такое правапарушэньне прадугледжана пазбаўленьне волі на тэрмін ад 5 да 10 гадоў з штрафам або безь яго.
Як сказаў грамадзянін Беларусі ў часе судовага пасяджэньня, марыхуанай яго «пачаставала» незнаёмка, калі той са сваёй дзяўчынай сьвяткаваў у Кіеве свой дзень нараджэньня. Менавіта гэты «пачастунак» ён і спрабаваў вывезьці ў Беларусь. Яго абвінавачвалі паводле часткі 2 артыкулу 305 Крымінальнага кодэксу Ўкраіны аб кантрабандзе наркатычных рэчываў — аналягу артыкулу 328/1 Крымінальнага кодэксу Беларусі.
Паводле афіцыйнай інфармацыі, асуджаных у Беларусі паводле 328-га артыкулу прыкладна шэсьць тысяч, або 1/6 ад усіх вязьняў папраўчых установаў краіны. У дарослых калёніях гэта пераважна маладыя людзі ад 18 да 30 гадоў. У Бабруйскай дзіцячай калёніі сустракаюцца і 14-гадовыя — ня толькі спажыўцы, але і прадаўцы наркотыкаў.
Раней паведамлялася, што сёлета пад амністыю могуць трапіць 1600 асуджаных паводле «наркатычнага» артыкулу. Але іх ня вызваляць зь месцаў пазбаўленьня волі, а толькі скароцяць тэрміны зьняволеньня на год (непаўналетнім — на два), калі іх асудзілі паводле «лягчэйшых» частак 1, 2 і 3 артыкулу 328.
Пакараньне за наркатычныя злачынствы ў Беларусі. Што важна ведаць
- У красавіку-траўні 2018 года актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- «Маці 328» лічаць, што ў некаторых выпадках тэрміны зьняволеньня несувымерныя злачынству, а закон недастаткова ўлічвае асобы злачынцаў, іх узрост ды іншыя акалічнасьці.
- 13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады. У ліпені Лукашэнка падпісаў закон аб зьмене КК.
