У тэлеграм-канале #МотолькоПомоги апублікаваны праект указу прэзыдэнта, які выключае 25,5 га зямлі зь ляндшафтна-рэкрэацыйнай зоны прыродных (леса- і лугапаркавых) тэрыторый паміж МКАД і заказьнікам «Лебядзіны» і ўключае гэты ўчастак у зону жылой зьмешанай забудовы.
Участак аддаецца пад будаўніцтва жыльля, культурна-забаўляльнага комплексу і прагулачнага парку.
Праект указу падрыхтаваны Менгарвыканкамам на даручэньне кіраўніка Беларусі Аляксандра Лукашэнкі: сфармаваць участак (альбо некалькі) у межах Ціміразева — МКАД — праспэкт Пераможцаў — «Лебядзіны» для наступнага продажу права яго праектаваньня і забудовы на аўкцыёне.
У ім гаворыцца, што цяпер вядзецца «інтэнсіўнае засваеньне» тэрыторыі ў межах вуліц Ціміразева — МКАД — праспэкта Пераможцаў — вуліцы Ратамскай. Тэрыторыя, якая застаецца незабудаванай і прымыкае да транспартнай разьвязкі скрыжаваньня вуліцы Ціміразева з МКАД і далей паміж МКАД і тэрыторыяй рэспубліканскага заказьніка «Лебядзіны» рэглямэнтамі генпляну Менску залічана да ляндшафтна-рэкрэацыйнай зоны асабліва ахоўных прыродных тэрыторый і да ляндшафтна-рэкрэацыйнай зоны прыродных (леса- і лугапаркавых) тэрыторый.
Папярэднія прапрацоўкі ў асваеньні ўчастка на скрыжаваньні Ціміразева — МКАД плошчай 25,5 га (частка зоны прыродных леса- і лугапаркавых тэрыторый) паказваюць «на прынцыповую магчымасьць яго больш эфэктыўнага выкарыстаньня».
На новым участку, адрэзаным ад заказьніка, плянуецца пабудаваць:
- жылы комплекс зьмяшанай павярховасьці (да 9 паверхаў) павышанай камфортнасьці агульнай плошчай жылога фонду звыш 40 тысяч квадратных мэтраў, уключна зь дзіцячым садком;
- шматфункцыянальны сямейны культурна-забаўляльны комплекс «Дзіцячы сьвет», які ўключае ўсесэзонны крыты тэматычны парк атракцыёнаў і забаваў рэспубліканскага ўзроўню плошчай каля 15 тысяч квадратных мэтраў, гатэль, пункты харчаваньня і гандлю для дзяцей і падлеткаў, цэнтар экалягічнай адукацыі;
- тэматычны парк экалягічнай накіраванасьці з выхадам па экасьцежках у заказьнік «Лебядзіны»;
- прагулачны парк зь фізкультурна-аздараўленчымі і дзіцячымі пляцоўкамі.
Ля «Лебядзінага» ўжо будуе «Тапас»
Адразаць зямлю ад «Лебядзінага» пачалі яшчэ ў 2014 годзе. Спачатку пастановай Савету Міністраў ягоную тэрыторыю зьменшылі на 8 гектараў.
У лютым 2018 году Аляксандар Лукашэнка ўнёс зьмены ў генплян Менску. Ад ляндшафтна-рэкрэацыйнай зоны адарвалі яшчэ 3,45 га ў раёне вуліц Ціміразева — Ратамскай.
Частку гэтых зямель перадалі кампаніі «Тапас», якая, згодна з указам 2014 году, будуе жылыя комплексы «Браслаўскі» і «Алімпік-парк» побач з заказьнікам (у межах праспэкту Пераможцаў, вуліц Браслаўскай і Ціміразева).
Уладальнік кампаніі «Тапас» — форвард хакейнай каманды прэзыдэнта Павал Белы. Зямельныя ўчасткі «Тапас» атрымаў без аўкцыёну, далі яму і розныя льготы.
Адміністрацыя Цэнтральнага раёну Менску ў лістападзе 2018 году выявіла, што «Тапас» выконваў будаўніча-мантажныя работы «без дазвольнай і праектнай дакумэнтацыі». За гэта суд аштрафаваў забудоўніка.
Высьветлілася, што «Тапас» будуе «шматфункцыянальны комплекс» на землях, якія ўсё яшчэ ўваходзяць у тэрыторыю заказьніку.
Аднак указам Лукашэнкі ад 5 сьнежня 2018 году № 468 у генплян Менску тэрмінова ўнесьлі зьмены — будоўлю выключылі з зоны прыродных тэрыторый пад асаблівай аховай. Указам Лукашэнка дадаткова зьменшыў межы «Лебядзінага».
Пасьля гэтага Менгарвыканкам 26 ліпеня 2019 году зацьвердзіў праект дэталёвага плянаваньня на гэтую тэрыторыю з улікам разьмяшчэньня аб’екта кампаніі «Тапас».
Там узводзіцца аднапавярховы рэстаран на 100 месцаў, набярэжная, а таксама пляцоўка з альтанкай для назіраньня за птушкамі. Агульная плошча — 4,12 га. Пры гэтым зямельны ўчастак пад будаўніцтва рэстарана зацьвердзілі толькі ў красавіку 2019 году. Грамадзкія слуханьні правялі, калі рэстарацыя была фактычна пабудаваная.
