Палата прадстаўнікоў Беларусі 29 ліпеня адказала на пэтыцыю супраць закону аб адтэрміноўках, якую за дзень сайце petitions.by падпісалі 10 тысяч беларусаў.
Адказ разьмешчаны на афіцыйным сайце Палаты прадстаўнікоў (у разьдзеле «Пытаньне – адказ») без накіраваньня апавяшчэньняў заяўнікам, паколькі ён «носіць масавы характар». На сайце petitions.by адказ зьявіўся 31 ліпеня.
У ім гаворыцца, што ў Палаце прадстаўнікоў «прынялі да ведама» выкладзеныя ў звароце думкі і аргумэнты, аднак на стадыях падрыхтоўкі законапраект прайшоў працэдуру ўзгадненьня і, паводле экспэртных заключэньняў, ён адпавядае Канстытуцыі Беларусі і сумяшчаецца зь беларускім заканадаўствам.
Тое, што закон не дае адтэрміноўкі ад прызыву для працягу адукацыі студэнтам, якія атрымліваюць вышэйшую адукацыю II ступені, асьпірантам і дактарантам, «не пазбаўляе права грамадзян на адукацыю», пасьля дэмабілізацыі ім «гарантуецца працяг навучаньня на ранейшых умовах».
Таксама ў адказе падкрэсьліваецца, што ёсьць магчымаць даваць адтэрміноўку ад прызыву «таленавітым і запатрабаваным навукоўцам» — у адпаведнасьці з 8-м абзацам ч. 1 арт. 32 закону «Аб вайсковым абавязку і вайсковай службе».
Рэалізацыя палажэньняў закону дасьць магчымасьць забясьпечыць Узброеныя сілы Беларусі неабходнай колькасьцю прызыўнікоў, падвысіць матывацыю грамадзян да своечасовага праходжаньня службы, будзе садзейнічаць умацаваньню вайсковай бясьпекі дзяржавы, падкрэсьліваецца ў адказе. У выпадку нязгоды з адказам на зварот заяўнікі могуць яго абскардзіць.
«Закон аб адтэрміноўках». Што важна ведаць
24 ліпеня Аляксандар Лукашэнка падпісаў закон «Аб зьменах законаў па пытаньнях эфэктыўнага функцыянаваньня вайсковай арганізацыі дзяржавы» (так званы «закон аб адтэрміноўках»).
Прыняты ў другім чытаньні законапраект прадугледжвае, што:
- адтэрміноўку ад прызыву для працягу адукацыі ў Беларусі будуць даваць толькі адзін раз (калі адтэрміноўкай студэнт ужо скарыстаўся, то на час службы ва Ўзброеных сілах яму будзе давацца акадэмічны водпуск);
- тым, хто «належным чынам» атрымаў позву аб прызыве, але ўхіляецца ад прызыву, абмяжуюць выезд за мяжу (паводле міністра абароны Раўкова, абмежаваньне на выезд будзе тычыцца і тых, каго ваенкамат не знайшоў і ня змог уручыць позву);
- у вайсковым білеце могуць зрабіць пазнаку «адсутнасьць законных падставаў» для непраходжаньня службы, калі чалавек да 27 гадоў ухіляўся ад прызыву;
- тых, хто мае такую пазнаку, ня будуць браць на дзяржаўную службу, у Міністэрства ўнутраных спраў і Міністэрства надзвычайных сытуацый, органы фінансавых расьсьледаваньняў Камітэту дзяржаўнага кантролю, Сьледчы камітэт і Камітэт судовых экспэртызаў;
- замест разьмеркаваньня пасьля навучаньня ў ВНУ дазволяць служыць у войску па кантракце і не плаціць тады за адмову ад разьмеркаваньня.
Тэкст закону афіцыйна апублікаваны 30 ліпеня, асноўныя нормы набудуць моц праз 10 дзён. Гэта значыць, што прызыў, які адбудзецца ў жніўні-лістападзе, пройдзе паводле новых правілаў, але падобна, што ў тых, хто сёлета ўжо атрымаў адтэрміноўку і паступіў, напрыклад ,у магістратуру, права на адтэрміноўку адбіраць ня будуць.
