Сынод Баўгарскай праваслаўнай царквы адхіліў магчымае сумеснае набажэнства з папам рымскім Францішкам, які 5 траўня прыбыў у Баўгарыю зь візытам, у рамках якога ён таксама зьбіраецца наведаць Паўночную Македонію.
Пантыфік мае намер сустрэцца зь невялікай каталіцкай суполкай у Баўгарыі і наведаць цэнтар уцекачоў недалёка ад Сафіі.
Францішак і Ватыкан спадзяваліся на правядзеньне сумеснай «малітвы за мір» на плошчы ў Сафіі 6 траўня. Але праваслаўная царква Баўгарыі адмовілася ад сумеснага набажэнства.
«Хочам падкрэсьліць, што любая форма сумеснага літургічнага ці малітоўнага служэньня, а таксама нашэньне літургічнага адзеньня для нас непрымальная, паколькі сьвятыя каноны гэтага не дазваляюць», — заявіў сынод мясцовай праваслаўнай царквы.
Баўгарская праваслаўная царква зьяўляецца адзінай праваслаўнай царквой, якая не захацела браць удзел у працы камісіі, якая імкнецца палепшыць дыялёг з Рыма-каталіцкай царквой, якая мае каля 44 тысяч прыхільнікаў у Баўгарыі.
Папа Францішак падчас цяперашняй паездкі таксама наведае Паўночную Македонію, дзе ўшануе памяць памерлай маці Тэрэзы, якая нарадзілася ў 1910 годзе ў Скоп’е.