Прэзыдэнт Ўкраіны Пятро Парашэнка чакае пасьлядоўнага прагрэсу ў пытаньні аб вяртаньні Крыму Ўкраіне і пачатку работы міратворчай місіі ААН на Данбасе пасьля прэзыдэнцкіх выбараў. Пра гэта ён заявіў у інтэрвію тэлеканалу «Ўкраіна», паведамляе прэс-служба прэзыдэнта.
«Ні на якія таргі, ні на якія паддывановыя дамоўленасьці Ўкраіна ніколі ня пойдзе і Крым будзе вернуты Ўкраіне. Мы зробім усё магчымае, каб гэта было зроблена як мага хутчэй, адразу пасьля прэзыдэнцкіх выбараў...» — цытуе словы Парашэнкі выданьне «Ўкраінская праўда».
Паводле прэзыдэнта Ўкраіны, расейскі прэзыдэнт Уладзімір Пуцін вельмі спадзяецца, што будзе абраны не Парашэнка, а іншы кандыдат, які і «падорыць» Крым расейскай уладзе.
«Мая пазыцыя — не дачакаюцца. Мы вызвалім Крым», — падкрэсьліў Пятро Парашэнка. Ён адзначыў, што Украіна нарошчвае вайсковую моц, умацоўвае міжнародную салідарнасьць, забясьпечвае эканамічны рост.
У лютым 2014 году Расея акупавала ўкраінскі Крым і заявіла пра ўваходжаньне паўвострава ў склад РФ. Сусьветная супольнасьць асудзіла гэты крок і не пагадзілася зь ім, Генэральная асамблея ААН дзьвюма рэзалюцыямі пацьвердзіла ўкраінскі статус Крыму і адпрэчыла прэтэнзіі Расеі, а таксама прызнала яе дзяржавай-акупантам. У Маскве кажуць пра нібыта законнасьць захопу Крыму, насуперак міжнароднаму праву.
***
Выбары прэзыдэнта Ўкраіны адбудуцца 31 сакавіка. Па выніках апытаньня Цэнтру сацыяльных і маркетынгавых дасьледаваньняў «Соцыс», праведзенага з 5 па 10 сакавіка, лідэрам прэзыдэнцкага рэйтынгу зьяўляецца Ўладзімір Зяленскі, якога падтрымліваюць каля 28% тых, хто вызначыўся і мае намер галасаваць. Другую пазыцыю займае Пятро Парашэнка (19,6%), трэцюю — лідэрка партыі «Бацькаўшчына» Юлія Цімашэнка з амаль 15%.
Па выніках апытаньня Сацыялягічнай групы «Рэйтынг» за 1-7 сакавіка, Уладзіміра Зяленскага падтрымліваюць 24,7% тых, хто вызначыўся і мае намер галасаваць. Другую пазыцыю займае Юлія Цімашэнка (18,3%), трэцюю — Пятро Парашэнка (16,8%).
Што трэба ведаць пра прэзыдэнцкія выбары ва Ўкраіне
- Выбары прэзыдэнта Ўкраіны адбыліся ў два туры 31 сакавіка і 21 красавіка 2019 году.
- Па выніках першага туру найбольш галасоў набралі шоўмэн Уладзімір Зяленскі (за яго прагаласавалі 30,24% выбарнікаў) і дзейны кіраўнік краіны Пятро Парашэнка (15,95%). На трэцім месцы па выніках галасаваньня апынулася Юлія Цімашэнка — 13,40%, далей ідуць Юры Бойка (11,67%) і Анатоль Грыцэнка (6,91%).
- У другім туры перамог Зяленскі. Паводле папярэдніх вынікаў, ён набраў звыш 73% галасоў, Парашэнка атрымаў каля 24,5%.
- Прэзыдэнт Украіны выбіраецца на ўсенародных выбарах на пяць гадоў. На гэтую пасаду, як і ў Беларусі, можа прэтэндаваць любы грамадзянін, якому споўнілася 35 гадоў. Заканадаўства абмяжоўвае магчымасьць балятавацца больш чым на два тэрміны.
- Ва Ўкраіне парлямэнцка-прэзыдэнцкая форма праўленьня. Як вынік, прэзыдэнт мае абмежаваныя паўнамоцтвы: ён прызначае кіраўнікоў сілавых структураў (Службы бясьпекі, Міністэрства абароны, генэральнага пракурора), мясцовых дзяржаўных адміністрацый. Склад ураду і прэмʼер-міністра выбірае парлямэнт, але кандыдатуру на разгляд Вярхоўнай Рады ўносіць прэзыдэнт на падставе прапановы ўрадавай кааліцыі, сфармаванай у Вярхоўнай Радзе пасьля парлямэнцкіх выбараў.
- Прэзыдэнт Украіны не адказвае за эканамічную палітыку, але практычна ўсе кандыдаты ў прэзыдэнты ў часе выбарчай кампаніі маніпулююць выбарнікамі, абяцаючы зьніжэньне тарыфаў, цэнаў, а таксама павелічэньне заробкаў і пэнсій. У той жа час кіраўнік дзяржавы мае права накладваць вэта на законы, ухваленыя парлямэнтам, і пастановы ўраду ў выпадку іх неадпаведнасьці Канстытуцыі.
- Прэзыдэнт Украіны вызначае замежную палітыку і, адпаведна, прызначае міністра замежных спраў.
- Адначасова прэзыдэнт Украіны зьяўляецца галоўнакамандуючым Узброеных сілаў і старшынёй Рады нацыянальнай бясьпекі і абароны, склад якой таксама вызначае кіраўнік дзяржавы.
- Сёлетнія выбары былі найбольш канкурэнтнымі за ўсю гісторыю незалежнасьці Ўкраіны — для рэгістрацыі кандыдатам у Цэнтральную выбарчую камісію зьвярнуліся амаль 90 грамадзян, былі зарэгістраваныя 44 кандыдаты. Гэта найбольшая колькасьць прэтэндэнтаў на пасаду прэзыдэнта за ўсе гады незалежнасьці краіны: у 1999 годзе ў выбарах прэзыдэнта Ўкраіны ўдзельнічалі 13 кандыдатаў, у 2004-м — 24, у 2010-м — 18, у 2014-м — 21.
