Украінскі бок праінфармаваў партнэраў па «нармандзкім фармаце», Нямеччыну і Францыю, што падыме ў Менску пытаньне аб узмацненьні прысутнасьці місіі АБСЭ ў акваторыі Чорнага і Азоўскага мора. Пра гэта ў эфіры праекту Радыё Свабода Радыё «Крым.Рэаліі» распавяла прадстаўніца Ўкраіны ў кантактнай групе, першая віцэ-сьпікерка Вярхоўнай Рады Ўкраіны Ірына Герашчанка.
Паводле яе, спэцыяльная маніторынгавая місія АБСЭ мае права працаваць на ўсёй тэрыторыі Украіны, і на гэтай падставе Украіна патрабуе яе прысутнасьці ў анэксаваным Крыме.
«Нас вельмі хвалюе пытаньне мілітарызацыі некалі турыстычнага паўвострава. У Крыме ніколі не было столькі зброі, колькі сёньня нашпігавана там. Мы патрабуем маніторынгу гэтай украінскай тэрыторыі. Нас вельмі непакоіць, што Крым застаецца закрытым для любой назіральнай місіі, і для СММ АБСЭ, і для Чырвонага Крыжа, не дапускаюць у турмы ў акупаваным Крыме, і для місіі ААН па прадухіленьні катаваньняў, якая таксама не дапускаецца ў турмы», — сказала Герашчанка.
Паводле Герашчанкі, прадстаўнікі Расеі ў кантактнай групе ў Менску пазьбягаюць перамоваў аб Азоўскім моры і Керчанскай пратоцы.
Што трэба ведаць пра канфлікт Украіны і Расеі ў Азоўскім моры
Расея 25 лістапада заблякавала выхад украінскіх караблёў, якія плылі да Марыюпалю праз Керчанскі праліў, каб трапіць у Азоўскае мора. Тры ўкраінскія караблі і больш за 20 украінскіх маракоў захопленыя расейскімі вайскоўцамі.
- Раніцай 25 лістапада расейскі сухагруз перагарадзіў Керчанскую пратоку перад трыма ўкраінскімі суднамі, якія ажыцьцяўлялі плянавы пераход з порту Адэсы ў порт Марыюпаль Азоўскага мора. Пазьней расейскі пагранічны карабель пратараніў буксір Вайскова-марскіх сіл Узброеных сіл Украіны.
- Расейскія вайсковыя караблі з дапамогай авіяцыі і спэцназу атакавалі і захапілі пашкоджаны ўкраінскі буксір і два малыя браняваныя артылерыйскія катэры. Шэсьць украінскіх маракоў былі параненыя, двое зь іх у цяжкім стане.
- Паводле Расеі, украінскія караблі спрабавалі прайсьці празь Керчанскую пратоку незаконна. Украіна адкідае гэтае абвінавачваньне, спасылаючыся на міжнародныя і міжурадавыя пагадненьні.
- Ці праўда, што ўкраінскія караблі парушылі расейскую мяжу ў Азоўскім моры?
- Ва Ўкраіне абʼявілі ваеннае становішча з 28 лістапада да 27 сьнежня. Узброеныя сілы Ўкраіны прыведзеныя ў поўную баявую гатоўнасьць.
Дзе ва Ўкраіне ўвялі ваеннае становішча - Канфлікт у Азоўскім моры паміж Украінай і РФ узьнік пасьля ўвядзеньня ў эксплюатацыю моста ў анэксаваны Крым. Украіна заяўляе, што Расея на падставе праверак затрымлівае дзясяткі суднаў, якія ідуць ва ўкраінскія азоўскія парты. Паводле Масквы, праверкі ўкраінскіх суднаў законныя.
- Рада Бясьпекі ААН склікала 26 лістапада экстранае паседжаньне ў сувязі з рэзкім абвастрэньнем сытуацыі ў Керчанскім праліве, шэраг эўрапейскіх краінаў асудзілі дзеяньні Расеі ў Азоўскім моры.
- Суд Сімферопаля на два месяцы арыштаваў 24 украінскіх маракоў, захопленых расейскімі сілавікамі. Украінская пракуратура прызнала іх ваеннапалоннымі.
- Украіна на час дзеяньня ваеннага становiшча забараніла ўезд у краіну мужчынам – грамадзянам Расеі ва ўзросьце ад 16 да 60 гадоў.
- У верасьні 2019 году адбыўся абмен палоннымі паміж Расеяй і Ўкраінай, падчас якога захопленыя маракі вярнуліся ва Ўкраіну.
