Спэцыяльны дакладчык ААН па правах чалавека ў Беларусі францужанка Анаіс Марэн, якая брала ўдзел у пасяджэньні Асноўнай групы Мюнхэнскай канфэрэнцыі па бясьпецы, зьехала зь Менску да завяршэньня сустрэчы.
У афіцыйнай праграме канфэрэнцыі, падрыхтаванай беларускім МЗС, яна прадстаўленая як прафэсар Collegium Civitas з Варшавы. У гэтай якасьці яна і прыехала ў Беларусь.
Якраз у другі дзень канфэрэнцыі, 1 лістапада, уступіў у сілу яе мандат як спэцдакладчыка ААН па правах чалавека ў Беларусі. Але беларускія ўлады не прызналі яго. Ня выключана, што гэта і стала прычынай ад'езду Анаіс Марэн зь Беларусі . 1-га лістапада яе не было на пасяджэньні Асноўнай групы Мюнхэнскай канфэрэнцыі па бясьпецы.
Праваабаронцы «Вясны» кажуць, што ня мелі сустрэчаў з Анаіс Марэн у Менску.
Ранейшы спэцдакладчык Рады ААН па правах чалавека Міклаш Харасьці, мандат якога таксама не прызнавалі беларускія ўлады, прыяжджаў у Менск для ўдзелу ў канфэрэнцыі грамадзянскай супольнасьці, якая праходзіла ў Менску напярэдадні сэсіі Парлямэнцкай асамблеі АБСЭ.
Тады беларускі МЗС тлумачыў, што Харасьці прыбыў у Беларусь ня ў якасьці спэцыяльнага дакладчыка.
