Група актывістак руху «Маці-328» аднесла ў Палату прадстаўнікоў, дзе сёньня пачалася сэсія, зварот і пытаньні да дэпутатаў.
Зварот за некалькі дзён да адкрыцьця сэсіі ў інтэрнэце падпісалі больш за 500 чалавек. У ім два пытаньні.
Першае — ці будуць зьмены, якія плянуецца ўнесьці ў артыкул 328 КК, распаўсюджвацца на тых вязьняў, якія ўжо асуджаныя паводле гэтага артыкулу. Актывісты руху «Маці-328» дамагаюцца, каб зьмены распаўсюджваліся на іх, і просяць дэпутатаў гэта ўлічыць.
Другое — просьба выключыць з артыкулу паняцьце «асабліва небясьпечны» ў дачыненьні тых, хто распаўсюджвае наркотыкі, бо, як лічаць актывісты, гэта цягне за сабой больш жорсткія пакараньні для гэтых асуджаных і спараджае шэраг праблемаў для іх знаходжаньні ў калёніі.
Тацяна Канеўская, былая галадоўніца ў Калінкавічах, сказала Свабодзе, што дагэтуль дэпутаты ім не адказваюць і не тлумачаць, якія зьмены будуць унесеныя ў артыкул 328.
Зварот актывістак у Палаце прадстаўнікоў прынялі.
Усяго да будынка парлямэнту прыйшлі 11 актывістак руху «Маці-328», гэта ўдзельніцы галадоўкі ў Калінкавічах (6 чалавек з 7), таксама актывісткі з Магілёва і Менску.
Жанчыны праводзілі галадоўку з канца красавіка па сярэдзіну траўня (агулам больш за 2 тыдні), усяго ў ёй удзельнічалі больш за 15 чалавек, вынікам гэтай галадоўкі стала заява Аляксандра Лукашэнкі пра тое, што нязначна, але будзе лібэралізаваны «наркатычны» артыкул № 328 Крымінальнага кодэксу.
Пакараньне за наркатычныя злачынствы ў Беларусі. Што важна ведаць
- У красавіку-траўні 2018 года актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- «Маці 328» лічаць, што ў некаторых выпадках тэрміны зьняволеньня несувымерныя злачынству, а закон недастаткова ўлічвае асобы злачынцаў, іх узрост ды іншыя акалічнасьці.
- 13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады. У ліпені Лукашэнка падпісаў закон аб зьмене КК.
Таксама ў дзень пачатку восеньскай сэсіі парлямэнту актывісты Legalize Belarus даслалі ў Палату прадстаўнікоў, Адміністрацыю прэзыдэнта і Міністэрства ўнутраных спраў пэтыцыю, пад якой за 7 месяцаў падпісаліся 2969 чалавек.
У пэтыцыі прапануецца ўвесьці панятак «малой колькасьці» для кантраляваных рэчываў і адмяніць крымінальную адказнасьць за зварот «малой колькасьці» кантраляваных рэчываў.
Разам з пэтыцыяй актывісты даслалі праект закону пра асаблівы статус канабісу, а таксама заўвагі і прапановы што да антынаркатычнага заканадаўства.
