Прэм’ер-міністар Віктар Орбан выступіў з жорсткімі папрокамі ў адрас Эўрапарлямэнту, заявіўшы, што крытыка дзеяньняў Будапэшту, якая зьмяшчаецца ў дакладзе парлямэнцкага камітэту па грамадзянскіх свабодах, закранае гонар яго краіны.
Эўропа хоча абвінаваціць абаронцаў ўласных межаў, падкрэсьліў Орбан, выступаючы перад дэлегатамі Эўрапарлямэнту ў Страсбуры 11 верасьня.
Прычынай жорсткага выступу Орбана стала назначанае на 12 верасьня галасаванне ў Эўрапарлямэнце па дакладзе гэтага парлямэнцкага камітэту.
Аўтарка дакладу, дэпутатка ад фракцыі «зялёных» Джудыт Саргентыні, абвінаваціла Будапэшт у адмове прытрымлівацца эўрапейскай палітыкі ў галіне міграцыі ды ў парушэньні правоў меншасьцяў і нормаў прававой дзяржавы. З прэтэнзіямі да вугорскага ўраду выступілі таксама прадстаўнікі шэрагу іншых камітэтаў Эўрапарлямэнту і першы намесьнік старшыні Эўракамісіі Франс Тымэрманс.
Калі ў Эўрапарлямэнце прыйдуць да высновы, што Будапэшт парушае прынцыпы дэмакратыі, вяршэнства закону і захаваньня правоў чалавека, у дачыненьні да краіны можа быць запушчана юрыдычная працэдура паводле артыкулу 7 Дамовы пра Эўразьвяз, якая дазваляе, у прыватнасьці, пазбавіць яе права голасу ў Радзе ЭЗ.
