Пасольства Ўкраіны ў Нямеччыне ініцыявала крымінальныя справы супраць нямецкіх дэпутатаў, якія незаконна прыяжджалі ў анэксаваны Расеяй Крым.
Пра гэта пасол Украіны ў Нямеччыне Андрэй Мельнік распавёў «Эўрапейскай праўдзе».
Паводле яго слоў, украінскія ўлады могуць завочна асудзіць дэпутатаў за парушэньне законаў Украіны, якія прадугледжваюць да 8 гадоў пазбаўленьня волі за незаконнае наведваньне паўвострава. Ён прызнаў, што прыцягнуць парушальнікаў да рэальнай адказнасьці будзе цяжка, паколькі Нямеччына не выдае сваіх грамадзян.
У лютым Крым наведвалі дэпутаты ад правапапулісцкай «Альтэрнатыва для Нямеччыны». Дэпутат парлямэнту Бэрліну Хʼю Бронсан, які ўзяў удзел у паездцы, назваў візыт «асаблівым сыгналам» у намеры супрацоўнічаць з Расеяй. Іншы чалец дэлегацыі — дэпутат зямельнага парлямэнту Паўночны Рэйн-Вестфалія Рогэ Бэкамп — заявіў, што чальцоў дэлегацыі не хвалююць пагрозы Кіева забараніць ім уезд ва Ўкраіну.
Ад дэлегацыі і заяваў яе чальцоў адмежаваліся як урад Нямеччыны, гэтак і сама партыя «Альтэрнатыва для Нямеччыны». Як паказваў у сваім Твітэры ўкраінскі пасол Андрэй Мельнік, прадстаўнікі партыі накіраваліся ў Крым у якасьці прыватных асоб. Сьпікер нямецкага ўраду Штэфан Зайбэрт асудзіў паездкі суграмадзян на анэксаваную Расеяй тэрыторыю, паведамляла газэта Stern.
У мінулым годзе ўкраінскае пасольства ў Нямеччыне ініцыявала крымінальную справу супраць саліста групы Scooter Эйч Пі Бакстэра за незаконныя ўезд у Крым, дзе музыка даваў канцэрты.
