У Нямеччыне 29 жніўня ўлады дэмантавалі залатую статую прэзыдэнта Турцыі Рэджэпа Эрдагана, усталяваную ў панядзелак на цэнтральнай плошчы Вісбадэна ў рамках фэстывалю мастацтваў.
Рашэньне дэмантаваць 4-мэтровую статую турэцкага прэзыдэнта з паднятай уверх правай рукой, было прынятае пасьля масавых пратэстаў, якія выклікала яе ўстаноўка. Некалькі сотняў мясцовых жыхароў сабраліся на плошчы, статую хутка пакрылі надпісамі, у тым ліку «Турэцкі Гітлер».
Частка мясцовых жыхароў, аднак, падтрымала ўстаноўку статуі. Пасьля таго, як паліцыя заявіла, што ня можа гарантаваць бясьпеку, пажарныя падагналі на плошчу вялікі кран і вывезьлі статую.
Арганізатары фэстывалю, які ў гэтым годзе праходзіць пад дэвізам «Дрэнныя навіны», заявілі, што статую ўсталявалі для таго, каб спрыяць дыскусіі пра асобу Эрдагана, якую яны назвалі «супярэчлівай».
Каля трох мільёнаў жыхароў Нямеччыны — турэцкага паходжаньня. Значная частка з іх падтрымлівае Рэджэпа Эрдагана, але ў турэцкага лідэра ёсьць і мноства апанэнтаў, якія называюць яго дыктатарам, згадваючы рэпрэсіі супраць грамадзянскіх актывістаў і інтэлігенцыі і ўмацаваньне рэжыму асабістай улады.
